AQSH ayg‘oqchi sun’iy yo‘ldoshlari Kaxovka GES to‘g‘oni portlashini uning vayron bo‘lishidan oldin aniqlagan. Bu haqda The New York Times xabar berdi.

Bayden ma’muriyatining yuqori martabali mulozimining aytishicha, AQSH ayg‘oqchi sun’iy yo‘ldoshlari Kaxovka to‘g‘oni qulashidan biroz oldin portlashni payqagan, ammo amerikalik tahlilchilar to‘g‘onning qulashiga kim sababchi bo‘lganini va bu aynan qanday sodir bo‘lganini haligacha bilmaydi.

Rasmiyning so‘zlariga ko‘ra, infraqizil sensorlar bilan jihozlangan sun’iy yo‘ldoshlar to‘g‘on qulashidan biroz oldin katta portlash bilan mos keladigan termal belgini aniqlagan.

AQSH razvedkasi tahlilchilari to‘g‘on qulashi ortida Rossiya turgani haqida gumon qilmoqda, dedi ismini oshkor qilmaslik sharti bilan ma‘muriyatning yuqori martabali rasmiysi. Ammo AQSH razvedka agentliklarida portlashga kim javobgar ekani haqida aniq dalillar mavjud emas.

Prognozlarga ko‘ra, raketa hujumi bunchalik katta zarar keltirishi mumkin emas. Cheklangan makonda portlash paytida energiya ichki tuzilmalarga o‘tib, jiddiy zarar yetkazadi. Shunga qaramay, mutaxassislar buning uchun yuzlab kilogramm portlovchi moddalar kerakligini ilgari surdi.

“Bomba yoki raketaning tashqi portlashi to‘g‘onga faqat kichik zarar keltirgan bo‘lardi. Bunday halokatli ta’sirga erishish uchun bir necha marta ko‘proq portlovchi moddalar kerak”, — deydi Illinoys universitetining muhandislik professori va portlovchi moddalar bo‘yicha eksperti Nik Glumak.

Ukrainada urush boshlanganidan beri Kaxovka GES bir necha bor o‘qqa tutilgan, tomonlar bunda bir-birini ayblagan.

“To‘g‘onga yetkazilgan zarar uning qulashi uchun yetarli bo‘lganmi yoki yo‘qmi, hozircha aniq emas”, — degan ekspertlar.