Poytaxt Toshkentni Toshkent viloyatining Zangiota tumani Nazarbek shaharchasi bilan bog‘lovchi Nazarbek ko‘prigi foydalanishga topshirildi. Mazkur tadbirda ishtirok etgan viloyat hokimi Zoir Mirzayevning maʼlumot berishicha, ko‘prikdan bir kunda 30 mingta avtomobil va 24 ming piyoda o‘tib-qaytadi.
.jpg)
.jpg)
“2022-yilning ikkinchi va 2023-yilning birinchi yarmida Toshkent viloyatiga yo‘l va ko‘priklar qurilishi uchun 1 trillion 113 milliard so‘m mablag‘ ajratilgan. Bundan tashqari 600 milliard so‘mga yaqin mablag‘ faqat ichimlik suvi uchun sarflangan. Qolaversa, Toshkent viloyatidagi ijtimoiy soha obyektlarini qurish uchun, jami qurilish ishlariga 2,09 trillion so‘m mablag‘ ajratilgan. Bu raqam Toshkent viloyati aholisi bir yilda davlatdan besh yillik mablag‘ini oldi degani. Ilgari buncha mablag‘ni besh yilda o‘zlashtirar edik. Kuni kecha prezidentimiz yana ichki yo‘llar taʼmiri uchun bu mablag‘ga qo‘shimcha 440 milliard so‘m pul berdi”, — deydi viloyat hokimi mazkur ko‘prik ochilishida so‘z olar ekan.
Maʼlum bo‘lishicha, mazkur ko‘prik qurilishiga 72,9 mlrd so‘m mablag‘ ajratilib, jami 23 ta uy, do‘kon va noturar joy buzilishiga sabab bo‘lgan.
Zoir Mirzayevning qo‘shimcha qilishicha, Nazarbek ko‘prigining qurilishi reja bo‘yicha 2023-yilning noyabr oyida yakunlanishi kerak edi.
“Bu ko‘prik qurilishini shaxsan hurmatli yurtboshimizning o‘zlari nazoratga olishi, Bosh vazirimizning ikki marotaba kelib-ketishi, o‘zimizning ko‘p marotaba kelib nazorat qilib turishimiz evaziga qurilish ishlari olti oy avval, muddatidan oldin qurib bitkazildi. Bu ko‘prikdan bir kunda 30 mingta mashina o‘tsa, 23-24 ming nafar aholi o‘tib-qaytadi. Muhimi bugun shuncha aholining mushkuli oson bo‘ldi”, — deydi viloyat rahbari.
Zoir Mirzayev ko‘prik qurilishidagi muammolar sabab yuzaga kelgan noqulayliklar uchun hudud aholisidan uzr ham so‘radi.
.jpg)
Tadbir davomida ko‘prik qurilishida ishtirok etgan faol quruvchilarga to‘n kiydirilib, aholi nomidan minnatdorlik izhor etildi.
Izoh (0)