Shavkat Mirziyoyev amaliy tashrif bilan Cho‘lponota shahriga yetib bordi. Bu haqda Prezident matbuot xizmati xabar berdi.
Aeroportda O‘zbekiston prezidentini Qirg‘iziston Vazirlar Mahkamasi raisi — Prezident Administratsiyasi rahbari Aqilbek Japarov va boshqa rasmiy shaxslar kutib olgan.
Bugun, 2-iyun kuni Cho‘lponotada ikkinchi “Markaziy Osiyo – Yevropa Ittifoqi” sammiti bo‘lib o‘tadi. Uning kun tartibidan mintaqadagi mamlakatlarining Yevroittifoq bilan konstruktiv muloqotini yanada rivojlantirish va amaliy hamkorligini kengaytirish masalalari o‘rin olgan.
Bunday formatdagi birinchi mintaqaviy uchrashuv 2022-yil 27-oktabr kuni Ostona shahrida bo‘lib o‘tgan edi. O‘shanda Shavkat Mirziyoyev Markaziy Osiyodagi siyosiy muhit haqida gapirgan, Qozog‘iston prezidenti Qosim-Jo‘mart To‘qayev bilan uchrashuv o‘tkazgan, bosh vazir o‘rinbosarlari darajasida “Yevropa Ittifoqi—Markaziy Osiyo” iqtisodiy hamkorlik qo‘mitasini ta’sis etishni taklif qilgan edi.
Izoh (0)