Fanlar akademiyasida yangilangan va lotin yozuviga asoslangan o‘zbek alifbosida ilk bor chop etilgan “O‘zbek tilining izohli lug‘ati”ning taqdimoti o‘tkazildi. Bu haqda O‘zbekiston Fanlar akademiyasi matbuot xizmati ma’lum qildi.
“O‘zbek tilining izohli lug‘ati” O‘zbekiston prezidentining 2020-yil 20-oktabrdagi PF-6084-son farmoni bilan tasdiqlangan 2020—2030-yillarda o‘zbek tilini rivojlantirish va til siyosatini takomillashtirish konsepsiyasini 2020—2022-yillarda amalga oshirish dasturiga asosan ilk bor lotin yozuviga asoslangan o‘zbek alifbosida tayyorlangan va 6 jilddan iborat.
Izohli lug‘at Vazirlar Mahkamasi huzuridagi O‘zbek tilini rivojlantirish jamg‘armasi, Fanlar akademiyasi hamda G‘afur G‘ulom nomidagi nashriyot-matbaa ijodiy uyi hamkorligida tayyorlangan.
Izohli lug‘atdan hozirgi o‘zbek adabiy tilida keng iste‘molda bo‘lgan 80 mingdan ortiq so‘z va so‘z birikmalari, fan, texnika, san‘at va madaniyat sohalariga oid terminlar, bir necha shevada qo‘llanadigan so‘zlar, ba‘zi tarixiy va eskirgan atamalar o‘rin olgan.
2020-yilda nashr etilgan “O‘zbek tilining izohli lug‘ati” kirill yozuvida 5 jilddan iborat bo‘lgan bo‘lsa, bu nashr 6 jilddan iborat va unga 5 000 ga yaqin yangi so‘z kiritilgan. Izohli lug‘atning dastlabki jildlarini tayyorlashda marhum olimlar — akademik Azim Hojiyev, akademik To‘ra Mirzayev, akademik Ernis Begmatov bevosita ishtirok etgan.