Соғлиқни сақлаш вазири Амрилло Иноятов Ўзбекистондаги мавжуд поликлиникалар бундан 5-10 йил аввал иссиғи чиққан ёш болага, қон босими ошган кексаларга ҳам ёрдам кўрсатолмайдиган даражада бўлганини тан олди. Бу ҳақда вазир Тошкент туманлараро перинатал маркази очилишида гапирди, дея хабар берди “Дарё” мухбири.
Маълум бўлишича, соғлиқни сақлаш вазири Амрилло Иноятов ҳамда Тошкент вилояти ҳокими Зоир Мирзаев бугун Тошкент туманлараро перинатал маркази очилишида ОАВ вакилларига кўриниш берган.
Қайд этилишича, шу пайтгача Тошкент вилоятининг Бекобод, Янгийўл, Олмалиқ шаҳарлари ва Қуйи Чирчиқ туманида туманлараро перинатал марказлар ташкил этилган.
“Бунга қадар 110 ўринли Тошкент тумани туғуруқ комплексида йилига 5,5 мингга яқин туғуруқ қайд этилиб, фақатгина шу ҳудуд аҳолисига хизмат кўрсатган. Шифохона асосан асоратсиз туғуруқларни қабул қилишга мўлжалланган бўлиб, асоратли ва кам вазн билан туғилган чақалоқлар республика муассасаларига ва Чирчиқ шаҳрида жойлашган вилоят перинатал марказига 50—70 километр масофа босиб олиб борилар эди. Туғуруқ мажмуасини перинатал марказга айлантириш учун 18,2 миллиард сўм инвестиция дастури доирасида маблағ сарфланди. Марказ замонавий тиббий асбоб-ускуналар билан тўлиқ жиҳозланди. Бунинг учун 2,1 миллиард сўм маблағ ажратилди. Муассасада қўшимча 10 ўринли Чақалоқлар патологияси ва 6 ўринли Чақалоқлар реанимацияси бўлимлари ташкил этилди”, — дейди туманлараро перинатал марказ очилишида сўз олганлар.
Мазкур тадбирда сўз олган Соғлиқни сақлаш вазири Амрилло Иноятов Ўзбекистондаги мавжуд поликлиникалар бундан 5-10 йил аввал иссиғи чиққан ёш болага ҳам, қон босими ошган кексаларга ҳам ёрдам кўрсатолмайдиган даражада эканини айтди.
“Она боласи температура қилса, боласини 50—70 километр жойга кўтариб борганда ёки қарияларимиз касал бўлиб қолганда, қон босими ошганда поликлиникаларимизда ёрдам беролмаганимиз аччиқ ҳақиқат-ку. Бугун президентимизнинг одилона сиёсати сабаб бу поликлиникаларимиз аҳолига яқинлашди”, — дейди вазир.
Соғлиқни сақлаш вазирининг қўшимча қилишича, Ўзбекистондаги мавжуд поликлиникаларда айни кунга келиб Жаҳон соғлиқни сақлаш ташкилоти стандартларига тўғри келадиган имконият яратилди.
“Жаҳон соғлиқни сақлаш ташкилоти стандартларига қараганда, бемор ҳар 3 километрда, яъни 20 дақиқанинг ичида поликлиникаларга етиб бориши керак ва лозим бўлган ёрдамни олиши даркор. Бу халқаро даражадаги талабга жавоб берувчи имкониятлар бугун Ўзбекистонда ҳам яратилди. Соғлиқни сақлаш вазирлиги жуда катта марраларни кўзлаган. Ишонинг, бу баландпарвоз гап эмас”, — дейди вазир.
Вазирнинг билдиришича, келажакда беморлардаги 70 фоиз касалликларга тиббиётнинг бирламчи бўғинида бепул ёрдам кўрсатилади.
“Тиббиётнинг бирламчи бўғинида беморларда учраётган касалликларнинг 70 фоизига бепул даъво қилинади. Давлат томонидан бепул дори, ётоқ ва шифокор хизмати кафолатланади. Яқинда бу ҳақида ҳам эшитасизлар”, — дейди Амрилло Иноятов.
Изоҳ (0)