“Real” muxlislari Benzema bilan xayrlashishga tayyorgarlik ko‘rmoqda, saudiyaliklar kelishuvni yakunlash arafasida. Karim Benzema transferiga oid so‘nggi ma’lumotlar

Karim Benzema “Real Madrid”ni tark etishga yaqin turibdi. Fransiyalik hujumchiga Saudiya Arabistonidan taklif bo‘lgan va Karim “Qirollik klubi” prezidenti Florentino Peresni bu bo‘yicha ogohlantirgan.

Avvalroq Karim Benzemaga Saudiya Arabistonidan 2 yillik shartnoma taklif qilinayotgani haqida xabar berilgandi. Unga ko‘ra, hujumchi soliqlardan tashqari yiliga 200 million yevro maosh olishi mumkin bo‘ladi. Futbolchining “Real” bilan shartnomasi 2023-yilning iyun oyida yakuniga yetadi.

Fransiyalik hujumchi “Real” prezidenti bilan Saudiya Arabistonidan bo‘lgan taklif haqida suhbatlashdi. Florentino Peres “Oltin to‘p” sohibining har qanday qarorini qabul qilishini aytgan. Benzema 4-iyun, yakshanba kuni kelajagi borasida qaror chiqaradi. Ispaniya La Ligasi 2022/23-yilgi mavsumi so‘nggi turida “Real” “Atletik”ka qarshi maydonga tushadi. Ushbu bahs Benzema uchun “Qirollik klubi”dagi oxirgi o‘yin bo‘lishi mumkin.

“Qaymoqranglilar” muxlislari bo‘lajak o‘yin fransiyalik futbolchi uchun klubdagi so‘nggi uchrashuvi bo‘lishi mumkinligini biladi va hozirdan Benzema bilan xayrlashuv aksiyasiga tayyorgarlik ko‘rmoqda, deya xabar qilmoqda Cadena SER. Ushbu nashr Benzemaning “Real”dagi o‘rnini “Liverpul”ni ark etgan Roberto Firmino egallashi mumkinligi haqida ham yozmoqda. Yana “Tottenhem” forvardi Harri Keyn varianti ham bor, biroq “shporlar” ingliz uchun 100 million yevrodan ko‘p pul talab qilishi mumkin.

Jurnalist Fabrisio Romanoning qayd etishicha, Benzemaga Saudiyaning “Al-Ittihod” jamoasi tomonidan taklif yuborilgan. Klub Karimning javobini kutmoqda. Insayderga ko‘ra, forvardga bir mavsum uchun taxminan 100 million yevrolik shartnoma hamda bonuslar taklif qilingan.

Mario Korteganaga ko‘ra, Benzema kelajagi borasida qaror qabul qilib bo‘lgan va klubdagilar bundan xabardor. Janluka di Marsio esa Saudiya Arabistoni tomoni kelishuvni payshanba kuni yakuniga qadar tugallashni xohlayotgani haqida yozmoqda.

Fransuz joriy mavsum “qaymoqranglilar” safida La Ligada 23 ta o‘yinda ishtirok etib, 18 ta gol va 3 ta golli uzatmaga mualliflik qildi.