Карим Бензема “Реал Мадрид”ни тарк этишга яқин турибди. Франциялик ҳужумчига Саудия Арабистонидан таклиф бўлган ва Карим “Қироллик клуби” президенти Флорентино Пересни бу бўйича огоҳлантирган.
Аввалроқ Карим Бенземага Саудия Арабистонидан 2 йиллик шартнома таклиф қилинаётгани ҳақида хабар берилганди. Унга кўра, ҳужумчи солиқлардан ташқари йилига 200 миллион евро маош олиши мумкин бўлади. Футболчининг “Реал” билан шартномаси 2023 йилнинг июнь ойида якунига етади.
Франциялик ҳужумчи “Реал” президенти билан Саудия Арабистонидан бўлган таклиф ҳақида суҳбатлашди. Флорентино Перес “Олтин тўп” соҳибининг ҳар қандай қарорини қабул қилишини айтган. Бензема 4 июнь, якшанба куни келажаги борасида қарор чиқаради. Испания Ла Лигаси 2022/23 йилги мавсуми сўнгги турида “Реал” “Атлетик”ка қарши майдонга тушади. Ушбу баҳс Бензема учун “Қироллик клуби”даги охирги ўйин бўлиши мумкин.
“Қаймоқранглилар” мухлислари бўлажак ўйин франциялик футболчи учун клубдаги сўнгги учрашуви бўлиши мумкинлигини билади ва ҳозирдан Бензема билан хайрлашув акциясига тайёргарлик кўрмоқда, дея хабар қилмоқда Cadena SER. Ушбу нашр Бенземанинг “Реал”даги ўрнини “Ливерпуль”ни арк этган Роберто Фирмино эгаллаши мумкинлиги ҳақида ҳам ёзмоқда. Яна “Тоттенҳэм” форварди Ҳарри Кейн варианти ҳам бор, бироқ “шпорлар” инглиз учун 100 миллион евродан кўп пул талаб қилиши мумкин.
Журналист Фабрицио Романонинг қайд этишича, Бенземага Саудиянинг “Ал-Иттиҳод” жамоаси томонидан таклиф юборилган. Клуб Каримнинг жавобини кутмоқда. Инсайдерга кўра, форвардга бир мавсум учун тахминан 100 миллион евролик шартнома ҳамда бонуслар таклиф қилинган.
Марио Кортеганага кўра, Бензема келажаги борасида қарор қабул қилиб бўлган ва клубдагилар бундан хабардор. Жанлука ди Марсио эса Саудия Арабистони томони келишувни пайшанба куни якунига қадар тугаллашни хоҳлаётгани ҳақида ёзмоқда.
Француз жорий мавсум “қаймоқранглилар” сафида Ла Лигада 23 та ўйинда иштирок этиб, 18 та гол ва 3 та голли узатмага муаллифлик қилди.
Изоҳ (0)