Toshkent shahrida “To‘qimachilik haftaligi” doirasida “To‘qimachilik sanoatida ijtimoiy tadbirkorlik” mavzusida forum tashkil etildi.
Unda Oliy Majlis Senati Raisi, Odam savdosiga va majburiy mehnatga qarshi kurashish milliy komissiyasi raisi Tanzila Norboyeva, vazirlik va idoralar rahbarlari, shuningdek, yirik xalqaro kompaniyalar va xorijiy davlatlarning ish beruvchi konfederatsiyalari, O‘zbekistondagi diplomatik vakolatxona va xalqaro tashkilot vakillari ishtirok etdi.
Anjumanda to‘qimachilik sanoati korxonalarining ijtimoiy mas’uliyati, jumladan, ishchilar huquqlarini himoya qilish, mehnat sharoitlarini yaxshilash va ishlab chiqarishning ekologik barqarorligini ta’minlash masalalariga e’tibor qaratildi. Forum ishtirokchilari to‘qimachilik sanoatida ijtimoiy tadbirkorlikni rivojlantirish muhimligini ta’kidlab, iqtisodiyotning ushbu tarmog‘ini qo‘llab-quvvatlashga tayyor ekanini bildirdi.
Senat raisi o‘z so‘zida kuchli siyosiy iroda tufayli O‘zbekistonda mehnat munosabatlari tizimi tubdan isloh qilingani, fuqarolik jamiyati vakillari va xalqaro hamkor tashkilotlar, xususan, Xalqaro mehnat tashkiloti bilan samarali hamkorlik yo‘lga qo‘yilganini ta’kidlab o‘tdi. Shuningdek, sohaning qonunchilik va tashkiliy-huquqiy bazasi mustahkamlangani, xususan, xodimlar va ish beruvchilarning huquq va majburiyatlari nisbati yanada muvozanatli, teng mavqeda mustahkamlanganini alohida qayd etdi.
Anjuman doirasida ishchilar huquqlarini himoya qilish, biznesning ijtimoiy mas’uliyati va atrof-muhit barqarorligini ta’minlash, to‘qimachilik sanoatida ijtimoiy tadbirkorlikni rivojlantirish va mamlakatning iqtisodiy o‘sishi va barqaror rivojlanishiga ta’siri masalalari muhokama qilindi.
Konferensiyada Xalqaro mehnat tashkiloti va Xalqaro Moliya Korporatsiyasining tikuvchilik sanoatida munosib mehnat standartlari va tadbirkorlikni rivojlantirishga qaratilgan Better work qo‘shma dasturini O‘zbekistonda tatbiq etish bo‘yicha loyihaga start berildi.
Shuningdek, konferensiyada Odam savdosiga va majburiy mehnatga qarshi kurashish milliy komissiyasi raisi, Better Cotton Initiative dasturlari vakili Reychel Bekket va “O‘zto‘qimachiliksanoat” uyushmasi raisi I.Xaydarov o‘rtasida “Better Cotton hamda Odam savdosi va majburiy mehnatga qarshi kurashish milliy komissiyasi o‘rtasida 2023—2024-yillarda Barqaror rivojlanish bo‘yicha hamkorlikdagi tadbirlar rejasi” imzolandi.
Izoh (0)