Тошкент шаҳрида “Тўқимачилик ҳафталиги” доирасида “Тўқимачилик саноатида ижтимоий тадбиркорлик” мавзусида форум ташкил этилди.
Унда Олий Мажлис Сенати Раиси, Одам савдосига ва мажбурий меҳнатга қарши курашиш миллий комиссияси раиси Танзила Норбоева, вазирлик ва идоралар раҳбарлари, шунингдек, йирик халқаро компаниялар ва хорижий давлатларнинг иш берувчи конфедерациялари, Ўзбекистондаги дипломатик ваколатхона ва халқаро ташкилот вакиллари иштирок этди.
Анжуманда тўқимачилик саноати корхоналарининг ижтимоий масъулияти, жумладан, ишчилар ҳуқуқларини ҳимоя қилиш, меҳнат шароитларини яхшилаш ва ишлаб чиқаришнинг экологик барқарорлигини таъминлаш масалаларига эътибор қаратилди. Форум иштирокчилари тўқимачилик саноатида ижтимоий тадбиркорликни ривожлантириш муҳимлигини таъкидлаб, иқтисодиётнинг ушбу тармоғини қўллаб-қувватлашга тайёр эканини билдирди.
Сенат раиси ўз сўзида кучли сиёсий ирода туфайли Ўзбекистонда меҳнат муносабатлари тизими тубдан ислоҳ қилингани, фуқаролик жамияти вакиллари ва халқаро ҳамкор ташкилотлар, хусусан, Халқаро меҳнат ташкилоти билан самарали ҳамкорлик йўлга қўйилганини таъкидлаб ўтди. Шунингдек, соҳанинг қонунчилик ва ташкилий-ҳуқуқий базаси мустаҳкамлангани, хусусан, ходимлар ва иш берувчиларнинг ҳуқуқ ва мажбуриятлари нисбати янада мувозанатли, тенг мавқеда мустаҳкамланганини алоҳида қайд этди.
Анжуман доирасида ишчилар ҳуқуқларини ҳимоя қилиш, бизнеснинг ижтимоий масъулияти ва атроф-муҳит барқарорлигини таъминлаш, тўқимачилик саноатида ижтимоий тадбиркорликни ривожлантириш ва мамлакатнинг иқтисодий ўсиши ва барқарор ривожланишига таъсири масалалари муҳокама қилинди.
Конференцияда Халқаро меҳнат ташкилоти ва Халқаро Молия Корпорациясининг тикувчилик саноатида муносиб меҳнат стандартлари ва тадбиркорликни ривожлантиришга қаратилган Better work қўшма дастурини Ўзбекистонда татбиқ этиш бўйича лойиҳага старт берилди.
Шунингдек, конференцияда Одам савдосига ва мажбурий меҳнатга қарши курашиш миллий комиссияси раиси, Better Cotton Initiative дастурлари вакили Рейчел Беккет ва “Ўзтўқимачиликсаноат” уюшмаси раиси И.Хайдаров ўртасида “Better Cotton ҳамда Одам савдоси ва мажбурий меҳнатга қарши курашиш миллий комиссияси ўртасида 2023—2024 йилларда Барқарор ривожланиш бўйича ҳамкорликдаги тадбирлар режаси” имзоланди.
Изоҳ (0)