ИИВ Тезкор-қидирув департаменти томонидан қишлоқ хўжалиги маҳсулотларини чет элга экспорт қилувчи тадбиркорлардан бадал тўлашни талаб қилиб келган жиноий гуруҳ қўлга олинди.
Қайд этилишича, Фарғона вилояти Марғилон шаҳрида рўйхатдан ўтган МЧЖ масъул ходимлари 2018 йилдан буён Москвада фаолият юритувчи ташкилот вакиллари экспорт тариқасида юборилаётган қишлоқ хўжалиги маҳсулотларининг ҳар бир килограммидан олинган фойда ҳисобидан 40 центдан бадал тўлашни тайинлаб, турли тазйиқлар ўтказиб келаётганликларини маълум қилган.
Мазкур гуруҳ май ойининг учинчи ҳафтаси давомида Россияга юборилган маҳсулотлардан келиб тушган фойдадан жами 15 126 АҚШ доллари миқдорида пул талаб қилган.
23 май куни ИИВ Тезкор-қидирув департаменти ЖҚХ Коррупция ва иқтисодий жиноятларга қарши курашиш бошқармаси ходимлари томонидан ўтказилган тадбирда Тошкент шаҳар Олмазор туманида жойлашган ресторанда талаб қилинган пулларни товламачилик йўли билан олган гумонланувчилар қўлга олинган.
Ҳолат юзасидан Жиноят кодексининг 165-моддаси (товламачилик) 3-қисми “а” банди билан жиноят иши қўзғатилиб, гумонланувчилар қамоққа олинган.
Апрель охирларида Тошкент вилояти ИИББ Тезкор-қидирув хизмати ва ДХХ ходимлари томонидан қарз эвазига берилган пуллардан фоиз сифатида 1 000 АҚШ долларини товламачилик йўли билан талаб қилган жиноий гуруҳ қўлга олинганди.
Изоҳ (0)