Malibu milliarderlar uchun o‘yin maydonchasi bo‘lib, bu yerda Kim Kardashyan ham haqli ravishda o‘z o‘rniga ega.
Skims brendi asoschisi 7 yildan beri birga yashagan Kanye Uest bilan ajrashgandan so‘ng, Kardashyan ko‘chmas mulklari — Kalabasasdagi kvartirasi va Hidden Hillsdagi ranchosini sotishga qaror qildi va hashamatli uy-joy xarid qilishga sarmoya kiritdi. Malibu sohilidagi mashhur anklavdagi 4 ta yotoqxona va 6 ta hammomli uy modelga 70 million dollarga tushdi, deya xabar beradi New York Post. Uy avvalroq model Sindi Krouford va uning turmush o‘rtog‘i Rendi Gerberga tegishli bo‘lib, uni 2018-yilda xedj-fondning sobiq direktori Adam Vayssga 45 million dollarga sotgan.
Ko‘chmas mulk uch gektar hududda joylashgan. Uyning maydoni deyarli 700 kvadrat metrni tashkil qiladi. Turar joyga tennis korti joylashgan uzun yo‘l orqali kirish mumkin va uydan sal naridagi yo‘l esa Kardashyanlarga tegishli bo‘lgan xususiy plyajga olib boradi.
Dizaynerlar jamoasi yordamida qoyadagi uy Janubiy Kaliforniyaning tabiiy palitrasi va materiallarini birlashtirgan sokin vohaga aylantirildi. Ta’mirlash jarayonida basseyn, spa-salon va kiyim almashtirish xonalari yangilandi. Loyiha ustida ishlagan Harrison dizayn jamoasi, shuningdek, yangi avtoturargoh, shaxsiy to‘xtash joyi, veranda va ochiq havoda o‘tirish uchun maydoncha yaratdi.
Uyning birinchi qavatida mehmonxona, ofis, yemakxona va oshxona funksiyalarini birlashtirgan poldan shiftga qadar shisha eshikli katta xona mavjud. Derazalar okeanning ajoyib manzarasini taqdim etadi.
Asosiy yotoqxona kamin bilan jihozlangan. Xonadan shaxsiy terassa, spa-salon va kiyinish xonasiga kirish mumkin. Mehmon va qarindoshlar uchun vannasi bor ikkita qo‘shimcha yotoqxona, media zal va tabiiy yorug‘lik tushib turadugan sport zali mavjud. Yolg‘iz qolishni xohlaydiganlar alohida oshxona va hammomi bo‘lgan yotoqxonada qolishlari mumkin. Tashqarida basseyn, spa-salon va kaminli kiyim almashtirish uyi mavjud.
So‘nggi bir yil ichida plyaji bor bu shaharcha birinchi raqamli super-badavlat odamlar bilan to‘ldi. Kim Kardashyan Malibudagi eng qimmat uyni sotib olgan bo‘lsa-da, eng katta xarid bo‘yicha rekord unga emas, balki muhandis, investor va tadbirkor Mark Andressenga tegishli. U rafiqasi Laura Arrillaga-Andressen bilan birgalikda Malibuda 255,5 million dollarga uchta alohida uy xarid qilgan.
Izoh (0)