“Миллион” кулги жамоаси аъзоси Ўткир Шодмонов “Дарё”нинг YouTube’даги каналига берган интервьюсида Даврон Кобулов билан қандай танишгани, ўқитувчилик қилишининг сабаблари ва унга омад келтирган шеваси ҳақида сўзлаб берди.
— Даврон Кабуловни дискларда кўриб юрган бола эдим. “Гараж” лойиҳасига келганда у инсоннинг олдига бориб қўл узатишга ҳам иккиланганман. Балки бу гапим кимларгадир эриш туюлар, аммо ҳақиқатан ҳам тўрт йил аввал ҳаётим бунчалик ўзгариб кетишини ва катта саҳналарга чиқишимни тасаввур ҳам қилмагандим. “Гараж” кўрсатувининг илк сёмкасидан сўнг Самарқандга бориб, ҳаммага санъаткорлар билан учрашганим ҳақида айтиб берганимда ишонишмаганди, — дейди Ўткир Шодмонов.
Бир муддат Ҳамид Олимжон номидаги мусиқали театрда хор жамоасида ишлаган Ўткир Шодмонов айни кунларда мусиқа мактабида ўқувчиларга дарс беради. Уни ўқитувчи бўлишга ундаган жиҳатлар ва ўқувчилар билан муносабатини билишга қизиқдик.
— Ўқиганман, шу боис бу соҳада ҳам ишлашим керак. Аввалига театрнинг хор жамоасида ишладим. Ундан кейин ўзим ўқиган санъат мактабига ишга таклиф этишди. Айни дамда ўқувчиларга дирижёрликдан сабоқ бераман. Саҳнада комик актёр бўлганим билан, ишимга жиддий ёндашаман. Агар ўқувчилар дарс пайти “Миллион” ёки вайнларим ҳақида сўрашса, жаҳлим чиқади. Дарсда комик актёр эмас, ўқитувчи эканлигимни уқтираман. Рости пул учун ўқитувчилик қилаётганим йўқ. Ишимни яхши кўраман. Концерт арафасида ўз ҳисобимдан таътил олиб, Тошкентга келаман. Яна одамларда ўзи Тошкентда юрса ҳам у ердан ойлик олавераркан-да, деган хаёл ўтмасин, — деди Ўткир Шодмонов.
“Алё, эна” дея машҳурликка эришган Ўткир Шодмонов нима сабабдан шевасидан воз кечмаслиги ҳақида айтиб ўтди.
— Кўпчилик танишларим Тошкентга келгандан кейин ўз шевасида гапиришни исташмайди. Мен аввалдан шевамни ўзгартирмайман, деб ўз-ўзимга сўз бергандим. Бу менга қайсидир маънода омад ҳам олиб келди. Аслида, саҳнада ўзимнинг бошдан кечирганларимни ижро этаман. Тошкент вокзалидаги саргузаштлар ҳам 4-5 йил аввал ҳаётимда содир бўлган. Онам раҳматли ҳам образимда тасвирланганидек содда ва самимий инсон эди. “Миллион”нинг концертида “Алё эна” деб чиққан саҳна кўринишим кўпчиликка маъқул бўлган. Аммо очиғи, бу чиқиш ўзимга умуман ёқмаган.
Концертдан анча ўтиб, видео олсак-чи, деб ўйлаб қолганман. Қадрдон укаларим билан вокзалга бориб, қишлоқдан келган йигитнинг энасига қўнғироқ қилиши билан боғлиқ ҳазилни суратга олганмиз. Бир ҳафта уни ижтимоий тармоққа жойлашга иккиланганман. “Одамларга ёқмаса-чи”, деган қўрқув бор эди. Кейин нима бўлса бўлди, агар кам кўрилса ўчириб ташлайман деб Instagram саҳифамга жойлаганман. Обуначиларим ҳозиргидек кўп эмасди, у видео икки кунда 30 минг марта томоша қилинган. Ўша пайтда “Миллион”нинг концерт тайёргарлигига боришим керак эди. Ундан чиқиб видеони ўчираман дедим. Орадан 3-4 соат вақт ўтиб, видео 300 минг маротаба томоша қилинибди. Ана шундан кейин ўзимда куч топиб, ҳазил видеолар суратга олишни бошладим, — дейди Ўткир Шодмонов.
Изоҳ (0)