“Qishloqdagi uchta tomsiz uydan bittasi bizniki edi”. Jaydari vaynlari bilan tanilgan O‘tkir Shodmonov muhojir otasi va “Million”ga kelishi haqida (video)
Komik aktyor, “Million” jamoasi a’zosi O‘tkir Shodmonov “Daryo”ning YouTube’dagi kanaliga bergan intervyusida san’atga kirib kelishi, otasining muhojirlikda ishlashga majbur bo‘lgani va oilasi og‘ir sharoitda yashagani haqida gapirdi.
— San’atga qiziqishim maktab paytidan boshlangan desam mubolag‘a bo‘lmaydi. Tadbirlarda hazilomuz sahna ko‘rinishlari bilan ishtirok etardim. Oilamizda san’atkorlar yo‘q, faqatgina katta akam rassomchilik bilan shug‘ullanadi. Ota-onamning o‘qishga imkoni bo‘lmagan, ular tegirmonda ishlab, un chiqarib bozorda sotishgan. Oilada besh o‘g‘il va bir qiz farzandmiz. Ularning orasida faqatgina ikkita akam o‘qimagan, qolganlarining bari oliy ma’lumotli. Otam-onam o‘zlari o‘qimay qiyinchilik ko‘rishgani uchun bolalarining ta’lim olishiga alohida e’tibor berishgan.
— Maktabni bitirib, aktyorlik bo‘yicha o‘qishimni aytganimda akam qarshilik qilgan. Shundan keyin dirijyorlik bo‘yicha tahsil olganman. Kollejni tamomlab, Samarqand davlat universitetining musiqa fakultetiga o‘qishga kirganman. Akam “San’atkor emas, pedagog bo‘lasan”, deb ko‘p aytardi. Haqiqatan ham hozirgi kunda o‘zim tahsil olgan san’at kollejida drijyorlikdan dars beryapman. Oylik daromadim 3 million so‘m, ishimni va o‘quvchilarimni yaxshi ko‘raman, — deydi O‘tkir Shodmonov.
O‘tkir Shodmonov qiyinchilikda o‘tgan bolaligi haqida so‘zlab berdi.
— Qishlog‘imizda uchta shifersiz uy bo‘lsa, ularning bittasi bizniki edi. Maktabdan qaytayotganda yomg‘ir yoki qor yog‘sa, hamma bolalar xursand bo‘lardi. Biz esa “Yog‘masa edi, uyimiz ham suvga to‘ladi”, deb kelardik. Chunki haqiqatan ham uyimizning hamma yog‘idan chakki o‘tib, sovib ketardi. Ota-onam olti bolani enamning uyiga olib borib, o‘zlari uyda qolishardi. Kasal bo‘lib qolmasin deb xavotirlanishardi-da. Ko‘p bolali bo‘lgandan keyin baribir ro‘zg‘orda kamchilik bo‘ladi. Dadam ro‘zg‘orni to‘ldirish uchun bir necha yil Rossiyada muhojir bo‘lib ishlashga ham majbur bo‘lgan. To‘g‘risi, qiyinchiliklar haqida unchalik gapirgim kelmaydi. Chunki bunday kunlar hammaning boshidan o‘tadi. Shukrki, ulg‘ayganimizdan keyin qiyin kunlar ortda qoldi, — deydi O‘tkir Shodmonov.
O‘tkir Shodmonov qanday qilib “Million” jamoasiga qabul qilingani haqida gapirdi.
— Universitetning “Respekt” jamoasiga qabul qilishgan. Jamoa bilan “Quvnoqlar va zukkolar” musobaqalarida ishtirok etardik. Bir kuni jamoamiz bilan 1-oktabr Ustoz va murabbiylar kuniga bag‘ishlab intermediya sahnalashtirganmiz. Uni Ma’ruf Nosirov ko‘rib, unda iliq taassurot qoldirgan ekanman.
Universitetni tamomlagandan keyin Rossiya institutlarining biriga hujjat topshirganman. Men topshirgan fakultet defektologiya bo‘lib, u yerni tamomlaganlar nuqsonli bolalar bilan ishlaydigan pedagog bo‘lib chiqardi. Eng qizig‘i, imtihonda telefondan ko‘chirib savollarga javob berganman, ammo uni ustozlarga himoya qilib berish ham kerak ekan. Ammo men umuman rus tilini bilmas edim. “Tilni bilmay turib qanday o‘qimoqchisan?” deganda yigitlardan tarjimonlik qilib berishini so‘raganman. Eng qizig‘i, san’atkor ekanligim va bu sohani rivojlantirish niyatim borligini eshitib, menga yuqori ball qo‘yishgan. O‘sha yili 12 ta o‘zbek hujjat topshirgandi, shulardan faqatgina men shartnoma asosida o‘qishga qabul qilinganman.
Pul to‘lab o‘qimayman deb turganimda “Respekt”dagi jo‘ralarimdan biri qo‘ng‘iroq qilib, “Garaj” loyihasiga taklif etishayotgani haqida aytgan. Qishloqqa qaytib, to‘rt kundan keyin Toshkentga safar qilganman. Uydagilar ham urishishmagan. Davron Kabulov syomka paytida Toshkentda yashashimiz uchun barcha sharoitlarni yaratib bergan. Moddiy qiyinchiliklar bo‘lmagani uchun ham ko‘rsatuvdan bemalol ijod qilganmiz, — deydi O‘tkir Shodmonov.
Agar komik aktyorni yanada yaqindan bilishni istasangiz, u bilan bo‘lgan suhbatni to‘liq holda tomosha qiling.
