“Real Madrid” futbolchisi Vinisius Junior atrofidagi irqchilik bilan bog‘liq mojarolar davom etmoqda. “Qirollik klubi” prezidenti Florentino Peres braziliyalik hujumchi bilan uchrashdi, “Valensiya” — “Real” uchrashuvida ishlagan VAR hakamlari diskvalifikatsiya qilindi. “Daryo” futbolchi atrofidagi voqealarning davomi haqida ma’lumot beradi.
Birinchi qism:
“Buyuk futbolchilar o‘ynagan liga bugun irqchilarga tegishli!”. “Valensiya” muxlislari Vinisiusni “portlash”ga majbur qildi — u yig‘ladi, chetlatildi va ijtimoiy tarmoqda javob qildi (video)
“Real Madrid” mehmonda “Valensiya”ga qarshi maydonga tushdi. O‘yin davomida valensiyalik muxlislar “qaymoqranglilar” futbolchisi Vinisius Juniorni “maymun” deya haqorat qildi. Uchrashuv yakunida futbolchi o‘zini bosolmadi va janjal yuzaga keldi. Braziliyalik futbolchiga qizil kartochka ko‘rsatildi.
Peres futbolchi bilan uchrashdi, “Real” vaziyat yuzasidan prokuraturaga murojaat qildi
“Real” prezidenti Florentino Peres Vinisius Junior bilan uchrashdi va uni qo‘llab-quvvatlashini ma’lum qildi.
“Real” prezidenti o‘zining qo‘llab-quvvatlashini va e’tiborini bildirish, uni himoya qilish uchun qilinayotgan barcha choralar to‘g‘risida xabardor qilish va bunday holatga qarshi kurashish uchun oxirigacha borishini ko‘rsatish uchun Vinisius Junior bilan uchrashdi, — deyiladi Madrid klubi xabarida.
Madridning “Real” klubi Vinisius haqorat qilingani uchun Ispaniya bosh prokuraturasiga murojaat qildi.
“Real Madrid” futbol klubi bizning futbolchimiz Vinisius Juniorga qarshi bo‘lgan ishlar yuzasidan kuchli tarzda noroziligini bildiradi va bu voqealarni qoralaydi.
Madridning “Real” klubi bunday hujumlarni jinoyat deb hisoblaydi. Shu sababli klub faktlarni tekshirish va aybdorlarni aniqlash maqsadida Bosh prokuraturaga, xususan, nafratga asoslangan jinoyatlar va kamsitishlarga qarshi kurash bo‘yicha prokuraturaga ariza bilan murojaat qildi.
Ro‘y bergan voqealarning jiddiyligini inobatga olib, “Real Madrid” alohida ayblovchi sifatida Bosh prokuraturaga murojaat qildi, deyiladi klub bayonotida.
“Valensiya” — “Real” uchrashuvida ishlagan VAR hakami chetlatildi, Vinisius ham diskvalifikatsiya qilinishi mumkin
Ispaniya futbol federatsiyasi (RFEF) La Liganing 35-turi doirasidagi “Valensiya” — “Real” o‘yinida VAR tizimida ishlagan Ignasio Iglesias Vilyanuevani ishdan bo‘shatildi.
Ma’lumotlarga ko‘ra, VAR hakami Vilyanueva bosh hakamga faqat Vinisiusning zarbasi aks etgan video tasvirni ko‘rsatgani, lekin bunga sabab bo‘lgan Ugo Duroning harakatlarini ko‘rsatmagani uchun jazolangan. Ushbu xatti-harakatlar uchun hech qanday asos topilmadi.
Texnik hakamlar qo‘mitasi videotakrorlardan foydalanishni yaxshilash zarur deb hisoblagani uchun yana besh nafar VAR hakami ham vaqtinchalik lavozimidan chetlashtirildi.
“Valensiya” futbolchisi Ugo Duroning yuziga zarba bergani uchun Vinisius uch o‘yinga diskvalifikatsiya qilinishi mumkin. Bu braziliyalik futbolchi La Liganing 2022/23-yilgi mavsumida boshqa maydonga tusha olmasligi mumkinligini anglatadi.
Vinisiusni qo‘llab-quvvatlash davom etadi, futbolchi “Real”dan ketmoqchi emas
Fransiya terma jamoasi hujumchisi Killian Mbappe braziliyalik futbolchini qo‘llab-quvvatladi. “Sen yolg‘iz emassan, biz sen bilanmiz. Seni qo‘llab-quvvatlaymiz”, — deb yozdi “PSJ” futbolchisi Instagram sahifasida.
“PSJ”ning yana bir hujumchisi, Vinisius Juniorning vatandoshi Neymar ham futbolchi bilan birga ekanini ma’lum qildi: “Men sen bilanman”.
“Manchester Yunayted” va Braziliya terma jamoasi vingeri Antoni futbolchining yonini oldi: “Men sen bilanman. Har doim”.
“Manchester Siti” va Angliya terma jamoasi himoyachisi Kayl Uoker ham Vinisiusni qo‘llab-quvvatladi: “Birodar, biz sen bilanmiz. Irqchilik g‘alaba qozona olmaydi”.
Vinisius Junior ispaniyalik muxlislarning xatti-harakatlariga qaramay, “Real”da o‘ynashda davom etadi. Insayder Fabrisio Romanoning so‘zlariga ko‘ra, vinger jamoani tark etish niyatida emas, Madridliklar ham uni qo‘yib yubormoqchi emas. Tez orada bir yil oldin imzolangan shartnoma haqida rasman ma’lum qilinadi. U 2027-yilning yoziga qadar amal qiladi.
Izoh (0)