“Реал Мадрид” футболчиси Винисиус Жуниор атрофидаги ирқчилик билан боғлиқ можаролар давом этмоқда. Бразилия ҳукумати ҳолат юзасидан Испанияга шикоят билан чиқди, Испания футбол федерацияси Винисиусга кўрсатилган қизил карточкани бекор қилди, “Валенсия” жаримага тортилди. “Дарё” футболчи атрофидаги воқеаларнинг давоми ҳақида маълумот беради.
Биринчи қисм:
“Буюк футболчилар ўйнаган лига бугун ирқчиларга тегишли!”. “Валенсия” мухлислари Винисиусни “портлаш”га мажбур қилди — у йиғлади, четлатилди ва ижтимоий тармоқда жавоб қилди (видео)
Иккинчи қисм:
“Винисиус иши” давом этади. ВАР ҳакамлари четлатилди, “Реал” прокуратурага арз қилди.
Бразилия ҳукумати Испанияга шикоят билан чиқди, Винисиуснинг қизил карточкаси бекор қилинди, “Валенсия” эса жаримага тортилди
Винисиус Жуниорга нисбатан қилинган ирқчилик ва ҳақоратлар унинг ватани Бразилияда норозиликка сабаб бўлди. Мамлакат ҳукумати Испанияга расмий шикоят билан чиқди. Бразилия Ташқи ишлар вазирлигининг баёнотида ФИФА, Испания футбол федерацияси ва Ла Лигага ҳам мурожаат қилинган.
Бразилия ҳукумати бундай ирқчилик ҳаракатларининг олди олиниши ва такрорланмаслиги учун ҳозиргача самарали чоралар кўрилмаганидан чуқур афсусда. Испания ҳукумати ва спорт органларини айбдорларни жазолаш ва бундай хатти-ҳаракатларнинг такрорланишининг олдини олиш учун зарур чораларни кўришга чақирамиз. Шунингдек, ФИФА, Испания футбол федерацияси ва Ла Лигани тегишли чоралар кўришга чорлаймиз, — дейилади Бразилия ҳукумати баёнотида.
“Валенсия” — “Реал” учрашувида Винисиус Жуниорга кўрсатилган қизил карточка бекор қилинди. Испания футбол федерациясининг спорт мусобақалари қўмитаси узоқ муҳокамаларидан кейин футболчининг дисквалификациясини олиб ташлаш қарорига келган. Бунга бош ҳакамда вазиятни ва футболчининг бу ҳаракатига сабаб бўлган аввалги ҳолатлар бўйича маълумотлар етарли бўлмагани сабаб қилиб кўрсатилган.
Шундай қилиб бразилиялик ўйинчи “Реал Мадрид”нинг 24 май куни бўлиб ўтадиган “Райо Вальекано”га қарши ўйинида майдонга тушиши мумкин бўлади.
“Валенсия” жамоаси уй ўйинларини ўтказадиган “Месталья” стадиони Винисиус Жуниорга қилинган ирқчилик туфайли қисман ёпилади.
Испания футбол федерациясининг спорт мусобақалари қўмитаси Ла Лиганинг 35-тури доирасидан ўрин олган ўйинда “Реал” ҳужумчисига нисбатан ирқчилик руҳидаги ҳақоратларни амалга оширган мухлислар ўтирган “Марио Кемпес” трибунасини бешта ўйинга ёпишга қарор қилди.
Шунингдек, “Валенсия” 45 минг евро миқдорида жаримага тортилди. Клуб 10 иш куни ичида апелляция бериши мумкин.
Испания полицияси Винисиус Жуниорни ҳақорат қилган уч нафар ёш мухлисни ҳибсга олганини эълон қилди. Аввалроқ “Валенсия” бразилиялик футболчини ҳақорат қилган ишқибозларни бир умрга футболдан четлаштиришини маълум қилганди.
Бразилияда Винисиусга бағишланган акция бўлиб ўтди, “Барселона” вакили Рафинья футболчини қўллаб-қувватлади, Хави эса унинг қизил карточкаси бекор қилинганини танқид қилди
Бразилияда Винисиус Жуниорга бағишланган акция бўлиб ўтди. Рио-де-Жанейро шаҳрида жойлашган Исо Масиҳ ҳайкали чироғи футболчи билан бирдамлик рамзи сифатида ўчирилди. Акция ташкилотчилари ҳайкал чироғининг ўчирилишини “ирқчиликка қарши оммавий кураш рамзи ҳамда футболчи ва бутун дунё бўйлаб бундан азият чекаётганлар билан бирдамлик белгиси” деб атади.
“Барселона”нинг бразилиялик футболчиси Рафинья ватандоши Винисиус Жуниорни қўллаб-қувватлади. Каталония клубининг “Вальядолид”га қарши баҳсида (1:3) Рафинья 62-дақиқада захирага олинаётган вақтда либосини ечди. Унинг ички футболкасида “Кўзнинг ёрқинлигидан кўра терининг ранги муҳимроқ экан, уруш бўлаверади”, деган ёзув бор эди. Орқа томонига эса “Биз сен биланмиз, Вини”, деб ёзилганди.
“Барселона” мураббийи Хави ҳам ирқчилик ва ҳақоратларни қоралади, бироқ Винисиусга кўрсатилган қизил карточка бекор қилинганини танқид қилди.
“Ирқчилик ва ҳақорат хатти-ҳаракатлари жазоланиши керак, аммо қизил карточканинг бунга алоқаси йўқ. Винисиус томонидан қилинган ҳаракат майдонда содир бўлди”, — деди испаниялик мутахассис.
Изоҳ (0)