“Реал Мадрид” футболчиси Винисиус Жуниор атрофидаги ирқчилик билан боғлиқ можаролар давом этмоқда. “Қироллик клуби” президенти Флорентино Перес бразилиялик ҳужумчи билан учрашди, “Валенсия” — “Реал” учрашувида ишлаган VAR ҳакамлари дисквалификация қилинди. “Дарё” футболчи атрофидаги воқеаларнинг давоми ҳақида маълумот беради.
Биринчи қисм:
“Буюк футболчилар ўйнаган лига бугун ирқчиларга тегишли!”. “Валенсия” мухлислари Винисиусни “портлаш”га мажбур қилди — у йиғлади, четлатилди ва ижтимоий тармоқда жавоб қилди (видео)
“Реал Мадрид” меҳмонда “Валенсия”га қарши майдонга тушди. Ўйин давомида валенсиялик мухлислар “қаймоқранглилар” футболчиси Винисиус Жуниорни “маймун” дея ҳақорат қилди. Учрашув якунида футболчи ўзини босолмади ва жанжал юзага келди. Бразилиялик футболчига қизил карточка кўрсатилди.
Перес футболчи билан учрашди, “Реал” вазият юзасидан прокуратурага мурожаат қилди
“Реал” президенти Флорентино Перес Винисиус Жуниор билан учрашди ва уни қўллаб-қувватлашини маълум қилди.
“Реал” президенти ўзининг қўллаб-қувватлашини ва эътиборини билдириш, уни ҳимоя қилиш учун қилинаётган барча чоралар тўғрисида хабардор қилиш ва бундай ҳолатга қарши курашиш учун охиригача боришини кўрсатиш учун Винисиус Жуниор билан учрашди, — дейилади Мадрид клуби хабарида.
Мадриднинг “Реал” клуби Винисиус ҳақорат қилингани учун Испания бош прокуратурасига мурожаат қилди.
“Реал Мадрид” футбол клуби бизнинг футболчимиз Винисиус Жуниорга қарши бўлган ишлар юзасидан кучли тарзда норозилигини билдиради ва бу воқеаларни қоралайди.
Мадриднинг “Реал” клуби бундай ҳужумларни жиноят деб ҳисоблайди. Шу сабабли клуб фактларни текшириш ва айбдорларни аниқлаш мақсадида Бош прокуратурага, хусусан, нафратга асосланган жиноятлар ва камситишларга қарши кураш бўйича прокуратурага ариза билан мурожаат қилди.
Рўй берган воқеаларнинг жиддийлигини инобатга олиб, “Реал Мадрид” алоҳида айбловчи сифатида Бош прокуратурага мурожаат қилди, дейилади клуб баёнотида.
“Валенсия” — “Реал” учрашувида ишлаган VAR ҳаками четлатилди, Винисиус ҳам дисквалификация қилиниши мумкин
Испания футбол федерацияси (RFEF) Ла Лиганинг 35-тури доирасидаги “Валенсия” — “Реал” ўйинида VAR тизимида ишлаган Игнасио Иглесиас Вилянуэвани ишдан бўшатилди.
Маълумотларга кўра, VAR ҳаками Вилянуэва бош ҳакамга фақат Винисиуснинг зарбаси акс этган видео тасвирни кўрсатгани, лекин бунга сабаб бўлган Уго Дуронинг ҳаракатларини кўрсатмагани учун жазоланган. Ушбу хатти-ҳаракатлар учун ҳеч қандай асос топилмади.
Техник ҳакамлар қўмитаси видеотакрорлардан фойдаланишни яхшилаш зарур деб ҳисоблагани учун яна беш нафар VAR ҳаками ҳам вақтинчалик лавозимидан четлаштирилди.
“Валенсия” футболчиси Уго Дуронинг юзига зарба бергани учун Винисиус уч ўйинга дисквалификация қилиниши мумкин. Бу бразилиялик футболчи Ла Лиганинг 2022/23 йилги мавсумида бошқа майдонга туша олмаслиги мумкинлигини англатади.
Винисиусни қўллаб-қувватлаш давом этади, футболчи “Реал”дан кетмоқчи эмас
Франция терма жамоаси ҳужумчиси Киллиан Мбаппе бразилиялик футболчини қўллаб-қувватлади. “Сен ёлғиз эмассан, биз сен биланмиз. Сени қўллаб-қувватлаймиз”, — деб ёзди “ПСЖ” футболчиси Instagram саҳифасида.
“ПСЖ”нинг яна бир ҳужумчиси, Винисиус Жуниорнинг ватандоши Неймар ҳам футболчи билан бирга эканини маълум қилди: “Мен сен биланман”.
“Манчестер Юнайтед” ва Бразилия терма жамоаси вингери Антони футболчининг ёнини олди: “Мен сен биланман. Ҳар доим”.
“Манчестер Сити” ва Англия терма жамоаси ҳимоячиси Кайл Уокер ҳам Винисиусни қўллаб-қувватлади: “Биродар, биз сен биланмиз. Ирқчилик ғалаба қозона олмайди”.
Винисиус Жуниор испаниялик мухлисларнинг хатти-ҳаракатларига қарамай, “Реал”да ўйнашда давом этади. Инсайдер Фабрицио Романонинг сўзларига кўра, вингер жамоани тарк этиш ниятида эмас, Мадридликлар ҳам уни қўйиб юбормоқчи эмас. Тез орада бир йил олдин имзоланган шартнома ҳақида расман маълум қилинади. У 2027 йилнинг ёзига қадар амал қилади.
Изоҳ (0)