Qoraqalpog‘iston Respublikasi Vazirlar Kengashi “Suv tanqisligi sharoitida Qoraqalpog‘iston Respublikasida sholi ekinlarini oqilona joylashtirish hamda oziq-ovqat mahsulotlari taʼminoti barqarorligiga erishish chora-tadbirlar to‘g‘risida”gi hukumat qarori loyihasini muhokamaga qo‘ydi.
Hujjat loyihasi bilan Qoraqalpog‘iston Respublikasi Vazirlar Kengashi, Suv xo‘jaligi vazirligi, Qishloq xo‘jaligi vazirligi hamda “O‘zbeksholichilik” uyushmalarining 2023-yil hosili uchun sholi ekinlarini:
- istisno tariqasida Qoraqalpog‘iston Respublikasining Bo‘zatov, Mo‘ynoq va Taxtako‘pir tumanlariga joylashtirish;
- hajmini 20 ming gektargacha chegaralash;
- suv bilan taʼminlash, belgilangan tartibda kredit ajratish masalalarida imtiyoz va preferensiyalarni qo‘llash haqidagi takliflariga rozilik berilmoqda.
Shuningdek, aholini guruchga bo‘lgan ehtiyojlarini ishonchli taʼminlash maqsadida 60 ming tonna miqdorda sholi mahsulotlari zaxirasi yaratiladi, sholi mahsulotlari xaridi uchun tijorat banklari tomonidan sholi yetishtiruvchilariga belgilangan tartibda kredit ajratilishi taʼminlanadi.
“O‘zdonmahsulot” AK tizimidagi korxonalar tomonidan qonunchilikda belgilangan tartibda:
- sholi yetishtiruvchilar bilan mahsulot o‘rtacha tannarxiga 10 foiz ustama qo‘yib xarid qilish bo‘yicha shartnomalar tuzilishi;
- xarid qilingan sholini qayta ishlash harajatlarini inobatga olgan holda aholiga arzon narxlarda yetkazib berilishi taʼminlanadi.
Qarorda boshqa viloyatlar dehqon va fermer xo‘jaliklari hamda boshqa tashkilotlar (korxonalar, muassasalar, klasterlar, birlashmalar va kooperativlar)ga qishloq xo‘jaligi yerlaridan ushbu uchta hududda sholi ekish uchun shartnoma asosida foydalanish imkoniyatini berish bo‘yicha tanlov komissiyasini tashkil etish taklif etilmoqda.
Makroiqtisodiy va hududiy tadqiqotlar institutiga ko‘ra, kelgusi o‘n yillikda iqlim o‘zgarishlari va qo‘shni mamlakatlarda suv iste’molining ortishi O‘zbekistonda Amudaryo va Sirdaryo kabi daryolardan suv olinishini kamaytiradi. Buning natijasida qurg‘oqchilik va cho‘llanish jarayoni yanada kuchayib ketishi hamda aholi turmush darajasiga jiddiy ta’sir qilishi mumkin.
2030-yilga borib, O‘zbekistonda 7 milliard kub metr suv tanqisligi kuzatilishi va oqibatda mamlakat dunyodagi suv tanqis bo‘lgan 33 ta davlat qatoriga tushib qolishi ehtimoldan yiroq emas.
Izoh (0)