Қорақалпоғистон Республикаси Вазирлар Кенгаши “Сув танқислиги шароитида Қорақалпоғистон Республикасида шоли экинларини оқилона жойлаштириш ҳамда озиқ-овқат маҳсулотлари таъминоти барқарорлигига эришиш чора-тадбирлар тўғрисида”ги ҳукумат қарори лойиҳасини муҳокамага қўйди.
Ҳужжат лойиҳаси билан Қорақалпоғистон Республикаси Вазирлар Кенгаши, Сув хўжалиги вазирлиги, Қишлоқ хўжалиги вазирлиги ҳамда “Ўзбекшоличилик” уюшмаларининг 2023 йил ҳосили учун шоли экинларини:
- истисно тариқасида Қорақалпоғистон Республикасининг Бўзатов, Мўйноқ ва Тахтакўпир туманларига жойлаштириш;
- ҳажмини 20 минг гектаргача чегаралаш;
- сув билан таъминлаш, белгиланган тартибда кредит ажратиш масалаларида имтиёз ва преференсияларни қўллаш ҳақидаги таклифларига розилик берилмоқда.
Шунингдек, аҳолини гуручга бўлган эҳтиёжларини ишончли таъминлаш мақсадида 60 минг тонна миқдорда шоли маҳсулотлари захираси яратилади, шоли маҳсулотлари хариди учун тижорат банклари томонидан шоли етиштирувчиларига белгиланган тартибда кредит ажратилиши таъминланади.
“Ўздонмаҳсулот” АК тизимидаги корхоналар томонидан қонунчиликда белгиланган тартибда:
- шоли етиштирувчилар билан маҳсулот ўртача таннархига 10 фоиз устама қўйиб харид қилиш бўйича шартномалар тузилиши;
- харид қилинган шолини қайта ишлаш ҳаражатларини инобатга олган ҳолда аҳолига арзон нархларда етказиб берилиши таъминланади.
Қарорда бошқа вилоятлар деҳқон ва фермер хўжаликлари ҳамда бошқа ташкилотлар (корхоналар, муассасалар, кластерлар, бирлашмалар ва кооперативлар)га қишлоқ хўжалиги ерларидан ушбу учта ҳудудда шоли экиш учун шартнома асосида фойдаланиш имкониятини бериш бўйича танлов комиссиясини ташкил этиш таклиф этилмоқда.
Макроиқтисодий ва ҳудудий тадқиқотлар институтига кўра, келгуси ўн йилликда иқлим ўзгаришлари ва қўшни мамлакатларда сув истеъмолининг ортиши Ўзбекистонда Амударё ва Сирдарё каби дарёлардан сув олинишини камайтиради. Бунинг натижасида қурғоқчилик ва чўлланиш жараёни янада кучайиб кетиши ҳамда аҳоли турмуш даражасига жиддий таъсир қилиши мумкин.
2030 йилга бориб, Ўзбекистонда 7 миллиард куб метр сув танқислиги кузатилиши ва оқибатда мамлакат дунёдаги сув танқис бўлган 33 та давлат қаторига тушиб қолиши эҳтимолдан йироқ эмас.
Изоҳ (0)