Toshkentda ayol va qizini garovga olib, ularni o‘ldirish bilan tahdid qilgan erkakka hukm o‘qildi. Bu haqda “Bu kun” informatsion dasturida ma’lum qilindi.
Qayd etilishicha, mazkur voqea bundan ikki oylar oldin Mirobod tumanida sodir bo‘lgan. 50 yoshli erkak muntazam ravishda turmush o‘rtog‘i bilan janjallashib kelgan. O‘sha kuni ham u uyga kelib, janjal ko‘targan.
“Mast holatda kelib, eshiklarni tepdi, boshimni devorga urdi. O‘zimni himoya qilmoqchi bo‘lganimda qo‘limni kesdi”, — deydi jabrlanuvchi. Ayol zudlik bilan IIBga qo‘ng‘iroq qilgan. Huquq-tartibot organlari xodimlari yetib kelgan vaqtda erkak rafiqasining bo‘yniga pichoq tirab, ulardan ketishni talab qilgan.
Tezkor harakatlar natijasida ayol va qiz qutqarib qolingan.
“Aybimni tan olaman. Jahl ustida qo‘rqitish maqsadida qilgandim. Mening haqiqatim bolalarim ikki xil toifaga ajralib qoldi: birinchi farzandimiz boshqa otadan, ikkinchisi mendan. Mojarolarga shu sabab. Menda uy yo‘q, ichkuyovman”, — deydi ayblanuvchi.
Sudlanuvchi Jinoyat kodeksining 245-moddasi (shaxsni garov sifatida tutqunlikka olish) 2-qismi “a, b” bandlari bilan 10 yil muddatga ozodlikdan mahrum etildi.
May oylarining boshlarida Jizzax viloyati G‘allaorol tumanida ayoli va 5 yoshli farzandini bo‘g‘ib o‘ldirib, yoqib yuborgan 23 yoshli yigit umrbod ozodlikdan mahrum etilgandi.
Izoh (0)