“Qishloq xo‘jaligida aholi bandligini oshirish va yer uchastkalaridan samarali foydalanish chora-tadbirlari to‘g‘risida”gi prezident qaroriga muvofiq fermer xo‘jaliklariga ishchilari uchun to‘langan daromad solig‘i qaytarib beriladi.
Hujjatga ko‘ra, 2023-yil 1-apreldan 2024-yil 1-mayga qadar eksperiment tariqasida paxta yoki g‘alla yetishtirishga ixtisoslashgan fermer xo‘jaliklariga ularning ishchilarining mehnatga haq to‘lash tarzidagi daromadlari bo‘yicha to‘langan JSHODSni bir vaqtning o‘zida quyidagi shartlarga rioya qilinganda qaytarib beriladi:
- har bir gektar yer uchun oyiga kamida bir nafar ishchining band bo‘lishi;
- har bir nafar ishchi uchun oyiga mehnatga haq to‘lash tarzidagi daromad mehnatga haq to‘lash eng kam miqdorining bir baravaridan kam bo‘lmagan miqdorda belgilanganda;
- fermer xo‘jaligi o‘tgan yil yakuni bo‘yicha Soliq kodeksining 57-moddasi (qishloq xo‘jaligi tovar ishlab chiqaruvchilari) talablariga javob berganda.
2023-yil 1-apreldan boshlab tadbirkorlik subyektlari yangi qurilgan ko‘p qavatli ishlab chiqarish binolari, shu jumladan, 2023-yil 1-yanvardan keyin foydalanishga topshirilgan binolar yuzasidan yuridik shaxslarning mol-mulkiga solinadigan soliq bo‘yicha hisoblangan summani:
- 3 qavatli binoga – 0,9;
- 4 qavatli binoga – 0,8;
- 5 qavatli binoga – 0,7;
- 6 qavatli binoga – 0,6;
7 va undan yuqori qavatli binoga – 0,5 pasaytiruvchi koeffitsiyentni qo‘llagan holda, bino foydalanishga topshirilgan oydan boshlab 3 yildan ortiq bo‘lmagan muddatga to‘laydi. Bunda, ushbu bandda belgilangan pasaytiruvchi koeffitsiyent:
- mahsulot ishlab chiqarish bo‘yicha faoliyatni amalga oshirish uchun zarur bo‘lgan yordamchi xonalar bilan birga, agar ularning maydoni yangi qurilgan ko‘p qavatli ishlab chiqarish binosi umumiy maydonining 20 foizidan oshmagan bo‘lsa;
- ishlab chiqarish maqsadlarida bino bir nechta xo‘jalik yurituvchi subyektlar tomonidan birgalikda foydalanilayotgan bo‘lsa, bunday binoning har bir mulkdori tomonidan qo‘llaniladi.
Shavkat Mirziyoyev raisligida 15-may kuni kambag‘allikni qisqartirish va bandlikni ta’minlash chora-tadbirlari muhokamasi yuzasidan videoselektor yig‘ilishida tadbirkorlarni rag‘batlantirish haqida gap borgandi. Dasturda ishtirok etadigan tadbirkorlarga soliqlardan alohida imtiyozlar beriladi. Jumladan, kamida 20 foiz kambag‘al oila a’zosini bir yil davomida ish bilan ta’minlasa, mol-mulk va yer soliqlaridan ozod qilinadi. 5 million so‘mgacha ish haqi to‘layotgan tadbirkorlarga ijtimoiy soliq stavkasi 2 baravar kamaytiriladi. Kambag‘al oila a’zosi ham daromad solig‘idan ozod qilinadi.
Izoh (0)