O‘zbekistonning Sankt-Peterburgdagi diplomatik vakolatxonasiga o‘zbekistonlik migrant kelib, xotinini o‘ldirganini tan oldi. Bu haqda “Fontanka” nashri xabar berdi.
Ma’lum qilinishicha, 11-may kuni soat 10:00 larda Sankt-Peterburg shahrining Krasnoarmeyskaya ko‘chasida joylashgan konsullik nazorat-o‘tkazish punktiga 22 yoshli yigit kelgan. U xotinini o‘ldirgani va uning jasadi Murinodagi ijaraga olingan kvartirada yotganini aytgan.
Politsiya Sankt-Peterburgda noqonuniy yashayotgan O‘zbekiston fuqarosini konsullikda qo‘lga olgan. Jinoyat qidiruv bo‘limi xodimlari Murino shahridagi xonadonga yetib kelib, u yerda 19 yoshli ayol jasadini topgan.
Taxminlarga ko‘ra, ayol bo‘g‘ib o‘ldirilgan. Holat yuzasidan Rossiya Jinoyat kodeksining tegishli moddalari bilan jinoyat ishi qo‘zg‘atilgan.
Aprel oxirida Sankt-Peterburg shahrida o‘zbekistonlik erkak voyaga yetmagan qizga jinsiy zo‘ravonlik qilgani, mart oyida bo‘lsa Rossiyada odam o‘ldirgan o‘zbekistonlik migrant 13 yilga qamalgani to‘g‘risida xabar berilgandi.
Izoh (0)