Тошкентда хотини ва қизини гаровга олган ичкуёвга ҳукм ўқилди

Тошкентда аёл ва қизини гаровга олиб, уларни ўлдириш билан таҳдид қилган эркакка ҳукм ўқилди. Бу ҳақда “Бу кун” информацион дастурида маълум қилинди.

Қайд этилишича, мазкур воқеа бундан икки ойлар олдин Миробод туманида содир бўлган. 50 ёшли эркак мунтазам равишда турмуш ўртоғи билан жанжаллашиб келган. Ўша куни ҳам у уйга келиб, жанжал кўтарган.

“Маст ҳолатда келиб, эшикларни тепди, бошимни деворга урди. Ўзимни ҳимоя қилмоқчи бўлганимда қўлимни кесди”, — дейди жабрланувчи. Аёл зудлик билан ИИБга қўнғироқ қилган. Ҳуқуқ-тартибот органлари ходимлари етиб келган вақтда эркак рафиқасининг бўйнига пичоқ тираб, улардан кетишни талаб қилган.

Тезкор ҳаракатлар натижасида аёл ва қиз қутқариб қолинган.

“Айбимни тан оламан. Жаҳл устида қўрқитиш мақсадида қилгандим. Менинг ҳақиқатим болаларим икки хил тоифага ажралиб қолди: биринчи фарзандимиз бошқа отадан, иккинчиси мендан. Можароларга шу сабаб. Менда уй йўқ, ичкуёвман”, — дейди айбланувчи.

Судланувчи  Жиноят кодексининг 245-моддаси (шахсни гаров сифатида тутқунликка олиш) 2-қисми “а, б” бандлари билан 10 йил муддатга озодликдан маҳрум этилди.

Май ойларининг бошларида Жиззах вилояти Ғаллаорол туманида аёли ва 5 ёшли фарзандини бўғиб ўлдириб, ёқиб юборган 23 ёшли йигит умрбод озодликдан маҳрум этилганди.