Andijon “Saxovat” keksalar va nogironligi bo‘lgan shaxslar uchun internat uyi 10—17-may kunlari autsorsing xizmati uchun boshlang‘ich qiymati 714,5 million so‘mlik tender o‘tkazgan. “Daryo” muxbiri lot hujjatlarini ko‘zdan kechirish jarayonida shubhali holatni aniqladi.
Tenderda internat uyida yashovchi fuqarolarga 3 mahal issiq ovqat tayyorlash va yetkazib berish xizmati o‘ynalgan. G‘olib korxona 2023-yilning 8 oyi davomida har oy qariyb 3000 portsiya ovqat tayyorlashi kerak bo‘ladi.
Lotni yutish uchun ikkita tadbirkorlik subyekti raqobatlashgan:
- “Biznes Orzu-Maqsad” MChJ;
- “Paxtaobod Orzu-Maqsad” MChJ.
Komissiya a’zolarining yakuniy baholariga ko‘ra, tenderni “Biznes Orzu-Maqsad” yutib olgan. Shartnoma summasi qariyb 710 million so‘m. “Paxtaobod Orzu-Maqsad” esa zaxira yetkazib beruvchi deb belgilangan.
Statistika agentligi ma’lumotlariga ko‘ra, tender g‘olibi bo‘lgan “Biznes Orzu-Maqsad“ MChJ Andijon viloyati Paxtaobod tumani “Nodirabegim” mahallasida joylashgan.
Shubhalisi, tenderda unga raqobat uyushtirgan “Paxtaobod Orzu-Maqsad” MChJning yuridik manzili ham aynan Paxtaobod tumani “Nodirabegim” mahallasida hisoblanadi.
Bundan tashqari, bu ikki tadbirkorlik subyektining elektron pochta manzillari ham bir xil: orzu-maqsad@gmail.com.
Nomlari, joylashuv manzillari, aloqa ma’lumotlari juda ham o‘xshash bo‘lgan bu ikki firma o‘zaro aloqadormi? Ularni bir shaxs yoki bir oila boshqaradimi? Bu savollarni mas’ullar uchun ochiq qoldiramiz.
Izoh (0)