Andijon viloyati Qo‘rg‘ontepa tumani hokimining qishloq xo‘jaligi masalalari bo‘yicha o‘rinbosari Bahromjon Tursunov ushbu lavozimga noqonuniy tayinlangan bo‘lishi mumkin. Tuman hokimi suddan unga yengillik berishini so‘rab iltimosnoma kiritgan. Bu haqda “Daryo” muxbiri surishtiruv olib bordi.
Sanani eslab qoling!
Bahromjon Tursunov 1983-yilda Qo‘rg‘ontepa tumanida tug‘ilgan. U shirkat xo‘jaligi ishchiligidan dehqon bozori direktori, tuman hokimining o‘rinbosarligigacha bo‘lgan yo‘lni bosib o‘tgan. 2004-yilda Andijon qishloq xo‘jalik institutini tamomlagan, mutaxassisligi — ipakchilik. Hokim o‘rinbosarligiga tayinlanguniga qadar u Trade Imperia Evolution masʼuliyati cheklangan jamiyat rahbari bo‘lgan.
B.Tursunov 2023-yil 5-apreldan buyon (ushbu sanani eslab qoling) Qo‘rg‘ontepa tumani hokimining qishloq xo‘jaligi masalalari bo‘yicha o‘rinbosari sifatida ishlab kelmoqda.
Sud hukmi
Jinoyat ishlari bo‘yicha Izboskan tuman sudida 2022-yilning 17-may kuni Qo‘rg‘ontepa tumani hokimining sobiq o‘rinbosari Bahromjon Tursunov va boshqalarga nisbatan jinoyat ishi ko‘rib chiqilgan. Mahkama ishida Bahromjon Tursunov Jinoyat kodeksining 205-moddasi (hokimiyat yoki mansab vakolatini suiisteʼmol qilish) 2-qismining “a” (juda ko‘p miqdorda zarar yetkazgan holda) bandi va 209-moddasi (mansab soxtakorligi) 2-qismining “a” (takroran yoki xavfli retsidivist tomonidan) bandi bilan ayblangan.
Sud ish hujjatlarini ko‘rib chiqib, Bahromjon Tursunov Jinoyat kodeksining 209-moddasi (mansab soxtakorligi) 1-qismi (mansab soxtakorligi, yaʼni davlat organi, davlat ishtirokidagi tashkilot yoki fuqarolarning o‘zini o‘zi boshqarish organi mansabdor shaxsining g‘arazgo‘ylik yoki boshqa manfaatlarni ko‘zlab, rasmiy hujjatlarga bila turib soxta maʼlumotlar va yozuvlar kiritishi, hujjatlarni qalbakilashtirishi yoki bila turib soxta hujjatlar tuzishi va taqdim etishi fuqarolarning huquqlariga yoki qonun bilan qo‘riqlanadigan manfaatlariga yoxud davlat yoki jamoat manfaatlariga jiddiy zarar yetkazilishiga sabab bo‘lsa) bilan aybli deb topgan. Unga nisbatan 1 yil mahalliy hokimiyat organlarida mansabdorlik lavozimlarida ishlash huquqidan mahrum qilish jazosi tayinlangan.
U sud tomonidan tayinlangan jazoni sud hukmi nusxasi IIB Probatsiya guruhiga kelib tushgan sanadan, yaʼni 2022-yilning 2-iyul kunidan boshlab o‘tay boshlagan.
Tayinlov nega noqonuniy?
Gap shundaki, tuman hokimining Baxromjon Tursunovni Qo‘rg‘ontepa tumani hokimining qishloq va suv xo‘jaligi masalalari bo‘yicha o‘rinbosari lavozimiga tayinlash to‘g‘risidagi qarori 5-aprel kuni chiqqan. Yaʼni ushbu sanada muayyan huquqdan mahrum qilish to‘g‘risidagi sud hukmi o‘z kuchida edi, aniqrog‘i, Tursunovga berilgan jazo muddat tugashiga 3 oydan ko‘p vaqt bo‘lishiga qaramay, mansabdorlik vazifasiga tayinlangan.
Ushbu qaror Xalq deputatlari tuman kengashining navbatdagi sessiyasi tasdig‘iga kiritilishi lozim edi. Biroq kengash kotibiyat mudiri Shukrullo Qo‘ldoshevning “Daryo”ga aytishicha, qaror kengash kun tartibiga kiritilmagan.
“Bizga bu qaror tushgan emas, biz tasdiqlamaganmiz. O‘rni bo‘shligi, tajribasi borligi uchun viloyat hokimi olib kelib qo‘ydi, “Shu ishlab tursin”, dedi. Biz 5-apreldan keyin ikki marta sessiya o‘tkazdik, lekin qaror bizga tushirilgani yo‘q. Qoida bo‘yicha qaror chiqqanidan keyin 10 kun ichida kengashga kiritilishi kerak”, — dedi kotibiyat mudiri.
Hokim o‘z xatosini to‘g‘rilamoqchi bo‘ldi
“Daryo” nashri surishtiruv boshlagandan keyin Qo‘rg‘ontepa tuman hokimi o‘z xatosini to‘g‘rilashga kirishgan. Tuman hokimi Elyorbek Nabijanovning shaxsan o‘zi sudga Bahromjon Tursunovga nisbatan tayinlangan muayyan huquqdan mahrum qilish jazosini o‘tashdan muddatidan ilgari shartli ozod qilish to‘g‘risidagi iltimosnoma kiritgan.
Iltimosnomada hokim Bahromjon Tursunov jazoni o‘tash davrida o‘ziga to‘g‘ri xulosa chiqarib olgani, intizomiy jazoga tortilmagani, uni moddiy javobgarlik bilan bog‘liq vazifalarga tayinlash uchun yuqoridagi jazodan muddatidan oldin shartli ozod qilinishi kerakligini qatʼiy taʼkidlagan.
Jinoyat ishlari bo‘yicha Qo‘rg‘ontepa tuman sudi 27-aprel kuni hokimning iltimosnomasini qanoatlantirgan. Unga ko‘ra, mahkum Bahromjon Tursunov sud tomonidan tayinlangan muayyan huquqdan, yaʼni mansabdorlik va moddiy javobgarlik bilan bog‘liq lavozimlarda ishlash huquqidan mahrum qilish jazosining qolgan 2 (ikki) oy 18 kun qismini o‘tashdan Jinoyat kodeksining 73-moddasi 3-qismi “a” bandiga asosan muddatidan ilgari shartli ozod qilingan.
Ko‘rinadiki, hokimlik 3 oydan ortiq (jazo 2022-yilning 2-iyul kunidan boshlab o‘tay boshlangan) o‘talmay qolgan jazo muddati bo‘la turib, sud hukmiga zid ravishda Bahromjon Tursunovni lavozimga tayinlagan.
“Daryo” voqealar rivojini kuzatib boradi.
Izoh (0)