Shavkat Mirziyoyev Yevropa tiklanish va taraqqiyot banki Boshqaruvchilar kengashining 32-yillik yig‘ilishida ishtirok etish uchun Samarqand shahriga keldi. Bu haqda Prezident matbuot xizmati xabar berdi.
Ma’lum qilinishicha, davlat rahbari yig‘ilish yalpi sessiyasida nutq so‘zlaydi. Sammit ishida Yevropa tiklanish va taraqqiyot banki prezidenti Odil Reno-Basso, Yevropa Komissiyasi vitse-prezidenti Valdis Dombrovskis, YTTB Boshqaruvchilar kengashi raisi Magnus Brunner, xorijiy hukumatlar, yetakchi transmilliy korporatsiyalar va sanoat xoldinglari, xalqaro moliya institutlari va bank rahbarlari va vakillari, shuningdek, dunyoning 70 ta mamlakatidan iqtisodiyot, investitsiyalar, moliya va innovatsiyalar sohasi ekspertlari va tahlilchilari, fuqarolik jamiyati faollari va jurnalistlar — jami 2,5 mingdan ziyod ishtirokchi qatnashmoqda.
Tadbir global iqtisodiyot istiqbollarini keng muhokama va chuqur tahlil qilish, uning barqaror taraqqiyotini taʼminlash yuzasidan tavsiyalar ishlab chiqish uchun muhim platformadir.
Iqtisodiyot barqarorligiga sarmoya kiritish, xalqaro savdoni rag‘batlantirish, energetik xavfsizlikni taʼminlash va qayta tiklanuvchi energiya manbalarini joriy etish, raqamlashtirishni jadallashtirish, moliyaviy infratuzilmani modernizatsiya qilish, kichik va o‘rta biznesni qo‘llab-quvvatlash, “yashil” iqtisodiyot dasturini ilgari surish masalalari forumning markaziy mavzulari bo‘ladi.
Tadbir doirasida davlat rahbarining xorijiy delegatsiya rahbarlari bilan qator uchrashuvlar o‘tkazishi rejalashtirilmoqda.
Ta’kidlanishicha, YTTB O‘zbekistondagi ijtimoiy-iqtisodiy islohotlar dasturini ilgari surishda faol ishtirok etmoqda.
“Mana uch yildirki, O‘zbekiston ushbu yetakchi moliyaviy institutdan jalb qilingan investitsiyalar hajmi bo‘yicha mintaqada yetakchilik qilmoqda. Bugungi kunda Bank loyihalarining portfeli 3 milliard yevrodan oshdi, unda xususiy sektorga investitsiyalar ulushi 55 foizdan ziyodni tashkil qilmoqda”, — deyiladi xabarda.
Samarqandda 16-may kuni Yevropa tiklanish va taraqqiyot banki (YTTB) Boshqaruvchilar kengashining “Iqtisodiy chidamlilik va barqarorlikka investitsiyalar kiritish” mavzusidagi 32-yillik yig‘ilishi boshlandi. O‘zbekiston tomonidan ushbu tadbirni o‘tkazish uchun ariza 2019-yilda berilgan va 2022-yilda tasdiqlangan.
Izoh (0)