Buxoro sharidagi xiyobon avtoturargohida bir fuqaroni kaltaklab, talonchilik bilan shug‘ullangan shaxslarga jinoyat ishi qo‘zg‘atildi. Bu haqda Buxoro viloyati IIB axborot xizmati xabar berdi.
Qayd etilishicha, 15-may kuni soat 10:00 larda Jondor tumani “Mirzayon” mahallasida yashovchi 23 yoshli Sh.N. sherigi 21 yoshli Sh.Sh. bilan oldindan jinoiy til biriktirib, bir guruh bo‘lib, “Boqiy Buxoro” xiyoboni avtoturargohida 25 yoshli A.A. bilan o‘rtalarida kelib chiqqan o‘zaro nizo natijasida janjallashgan.
Yigitlar fuqaro tanasining turli sohalariga urib, A.A.ga tegishli bahosi 2,5 million so‘m bo‘lgan Samsung S-10 rusumli, 300 ming so‘mlik Samsung verizon, 200 ming so‘mlik Novey rusumli telefon apparatlarini, fuqarolik pasporti, haydovchilik guvohnomasi hamda bahosi 1 million so‘m bo‘lgan Motion Control Neoline nomli antiradar moslamasini, shuningdek, 50 ming so‘mlik orqani ko‘rsatuvchi oyna, 4 dona to‘lov plastik kartalarini ochiqdan ochiq talon-toroj qilib, hodisa joyidan yashiringan.
Mazkur holat yuzasidan Jinoyat kodeksining 166-moddasi (talonchilik) 2-qismi bilan jinoyat ishi qo‘zg‘atilib, hozirgi kunda dastlabki tergov harakatlari olib borilmoqda.
Talonchilik holatlari
Aprel o‘rtalarida Toshkent viloyatida fuqarolarga zo‘rlik ishlatib, qo‘rqitish orqali ularni tunab kelgan jinoiy guruh ushlangan edi. Mart oyida esa Samarqand viloyati Jomboy tumanida fuqarolarni qo‘rqitib, yalang‘och holda suratga olgan va shu orqali ulardan pul talab qilgan ayol qo‘lga olingani, undan oldinroq Toshkentda muqaddam sudlangan 4 nafar shaxs dorixonada talonchilik qilgani to‘g‘risida xabar berilgandi.
Izoh (0)