15-may kuni Oliy Majlis Qonunchilik palatasida O‘zbekiston Ekologik partiyasi fraksiyasining navbatdagi yig‘ilishi bo‘lib o‘tdi. Unda bir qator qonun loyihalari ko‘rib chiqildi.
Dastlab, yig‘ilishda “O‘lchash vositalarini qiyoslashdan o‘tkazish sohasiga xususiy sektor jalb qilinishi munosabati bilan 'Metrologiya to‘g‘risida'gi qonunga o‘zgartish va qo‘shimchalar kiritish haqida”gi qonun loyihasi muhokama etildi.
Ta’kidlanganidek, mazkur qonun loyihasi metrologiya xizmatlarini ko‘rsatish sohasida xususiy sektorni keng jalb qilish hamda bu boradagi davlat tashkilotlarining eksklyuziv huquqlarini bekor qilish orqali sohada mavjud monopoliyani bartaraf etish maqsadida ishlab chiqildi.
Qonun loyihasida o‘lchash vositalarini qiyoslash xizmatlari davlat va xo‘jalik boshqaruvi organlari hisoblanmaydigan yuridik shaxslarning metrologiya xizmatlari tomonidan ko‘rsatilishiga ruxsat berish taklif etilmoqda.
Shuningdek, loyiha bilan o‘lchash natijalari davlat ahamiyatiga ega bo‘lgan o‘lchash vositalari turkumlarining ro‘yxati hukumat tomonidan tasdiqlanishi belgilanmoqda. Fraksiya a’zolari tomonidan qonun loyihasini takomillashtirish yuzasidan taklif va tavsiyalar berilib, qo‘llab-quvvatlandi.
Kun tartibidagi navbatdagi masala — “Ma’muriy jarimalarni ijro etish tizimi takomillashtirilishi munosabati bilan O‘zbekiston Respublikasining Ma’muriy javobgarlik to‘g‘risidagi kodeksiga o‘zgartishlar va qo‘shimcha kiritish haqida”gi qonun loyihasi ham atroflicha ko‘rib chiqildi.
Qonun loyihasi orqali Ma’muriy javobgarlik to‘g‘risidagi kodeksda belgilangan ma’muriy jarimalarning o‘z vaqtida undirilmaganligi yuzasidan Majburiy ijro byurosi tomonidan qo‘llaniladigan ma’muriy jarima miqdori undirilishi lozim bo‘lgan summadan yuqori bo‘lishi mumkin emasligi belgilanmoqda.
Shu bilan birga, loyihada sohada turli suiiste’molchiliklarning oldini olish maqsadida Majburiy ijro byurosi nomidan ma’muriy jarima qo‘llash vakolatiga ega bo‘lgan shaxslar doirasi aniq ko‘rsatilmoqda. Yig‘ilishda fraksiya a’zolari qonun loyihasi bo‘yicha o‘zlarining munosabatini bildirib, uni ma’qullashdi.
Izoh (0)