15 май куни Олий Мажлис Қонунчилик палатасида Ўзбекистон Экологик партияси фракциясининг навбатдаги йиғилиши бўлиб ўтди. Унда бир қатор қонун лойиҳалари кўриб чиқилди.
Дастлаб, йиғилишда “Ўлчаш воситаларини қиёслашдан ўтказиш соҳасига хусусий сектор жалб қилиниши муносабати билан 'Метрология тўғрисида'ги қонунга ўзгартиш ва қўшимчалар киритиш ҳақида”ги қонун лойиҳаси муҳокама этилди.
Таъкидланганидек, мазкур қонун лойиҳаси метрология хизматларини кўрсатиш соҳасида хусусий секторни кенг жалб қилиш ҳамда бу борадаги давлат ташкилотларининг эксклюзив ҳуқуқларини бекор қилиш орқали соҳада мавжуд монополияни бартараф этиш мақсадида ишлаб чиқилди.
Қонун лойиҳасида ўлчаш воситаларини қиёслаш хизматлари давлат ва хўжалик бошқаруви органлари ҳисобланмайдиган юридик шахсларнинг метрология хизматлари томонидан кўрсатилишига рухсат бериш таклиф этилмоқда.
Шунингдек, лойиҳа билан ўлчаш натижалари давлат аҳамиятига эга бўлган ўлчаш воситалари туркумларининг рўйхати ҳукумат томонидан тасдиқланиши белгиланмоқда. Фракция аъзолари томонидан қонун лойиҳасини такомиллаштириш юзасидан таклиф ва тавсиялар берилиб, қўллаб-қувватланди.
Кун тартибидаги навбатдаги масала — “Маъмурий жарималарни ижро этиш тизими такомиллаштирилиши муносабати билан Ўзбекистон Республикасининг Маъмурий жавобгарлик тўғрисидаги кодексига ўзгартишлар ва қўшимча киритиш ҳақида”ги қонун лойиҳаси ҳам атрофлича кўриб чиқилди.
Қонун лойиҳаси орқали Маъмурий жавобгарлик тўғрисидаги кодексда белгиланган маъмурий жарималарнинг ўз вақтида ундирилмаганлиги юзасидан Мажбурий ижро бюроси томонидан қўлланиладиган маъмурий жарима миқдори ундирилиши лозим бўлган суммадан юқори бўлиши мумкин эмаслиги белгиланмоқда.
Шу билан бирга, лойиҳада соҳада турли суиистеъмолчиликларнинг олдини олиш мақсадида Мажбурий ижро бюроси номидан маъмурий жарима қўллаш ваколатига эга бўлган шахслар доираси аниқ кўрсатилмоқда. Йиғилишда фракция аъзолари қонун лойиҳаси бўйича ўзларининг муносабатини билдириб, уни маъқуллашди.
Изоҳ (0)