Namangandagi 12 yashar bola vafot etgan attraksion faoliyati to‘xtatib qo‘yildi (video)

Namangan shahrining Bobur nomli bog‘idagi 12 yashar bola vafot etgan attraksion faoliyati to‘xtatib qo‘yildi. Bu haqda “Daryo” muxbiri Azizbek Abduvaliyev xabar bermoqda.

Hodisa joriy yil 14-may kuni sodir bo‘lgan. Uchqo‘rg‘on tumanidagi 8-umumtaʼlim maktabi direktori Muyassar Rahmatullayevaning bildirishicha, 6-sinfda tahsil olayotgan bir guruh o‘quvchilar ota-onalarining roziligi bilan Namangan shahridagi o‘lkashunoslik muzeyiga olib borilgan. Tanishuvdan so‘ng muzey yaqinidagi Bobur nomli madaniyat va istirohat bog‘iga olib borilgan. Bu yerda avval muzqaymoq yeyishgan, keyin attraksionlarga borishgan. Baxtsiz hodisa vagonchalardan iborat va tunnellardan o‘tiladigan “Yashil chiroqchalar” attraksionida ro‘y bergan.

Ushbu attraksion nazoratchisi Odil Hamidullayevning bildirishicha, oxirgi vagonchaga besh nafar o‘g‘il bola chiqqan. Vagoncha tunnel ichiga kirib ketganida ulardan biri o‘rtog‘iga yordam so‘rab murojaat qilgan.

“Darrov elektrni uzib, ichkariga kirdim. Bolalardan biri boshini tunnel devoriga urib olgan ekan. Darhol birinchi yordam ko‘rsatdim, so‘ng o‘zimning mashinamda tez tibbiy yordamga olib bordim. Dastlab holat yaxshidek ko‘ringan edi. Afsuski, o‘quvchining hayotini saqlab qolishning imkoni bo‘lmadi”, — deydi nazoratchi.

Mazkur holat yuzasidan Namangan shahar prokuratura tomonidan Jinoyat kodeksining 257-moddasi (mehnatni muhofaza qilish qoidalarini buzish) bilan jinoyat ishi qo‘zg‘atilgan. Namangan shahar IIO FMB tergov bo‘limi tomonidan tergov harakatlari olib borilmoqda.

Namangan viloyat IIB axborot xizmati rahbari Xurshidbek Soliyevning bildirishicha, hozirda mazkur attraksion muhrlanib, faoliyati to‘xtatib qo‘yilgan. Attraksionning texnik holati bo‘yicha tegishli ekspertizalar tayinlanadi.

Eslatib o‘tamiz, oldinroq Tog‘-kon geologiya va sanoat xavfsizligini nazorat qilish inspeksiyasining ayni paytda Andijon, Namangan, Qashqadaryo, Sirdaryo, Jizzax va Toshkent viloyatlarida vakillari yo‘q ekanligi va bu viloyatlardagi mavjud attraksionlar nazorati ham ochiqligicha qolayotgani maʼlum qilingandi.