BGI Genomics компанияси бош директори: “Ўзбекистонда оналик ва болаликни ҳимоя қилиш, соғлиқни сақлаш тизимини яхшилаш борасида самарали чора-тадбирларни амалга ошира оламиз”

17 май куни Хитой Халқ Республикасининг Сиан шаҳрида Ўзбекистон—Хитой бизнес-форуми бўлиб ўтди. Унда Хитойнинг 400 дан ортиқ йирик компаниялари вакиллари иштирок этди. Форум давомида қатор келишувлар ва шартномалар имзоланди. Шу билан бирга, турли соҳаларда муҳокамалар ҳам ўтказилди. 

BGI Genomics компанияси бош директори Жун Ченг тадбирда эришилган келишувлар юзасидан интервью берди. Унинг сўзларига кўра, ўтган йилнинг ноябрь ойида Тошкентда ҳомиладорлар ва янги туғилган чақалоқларга тиббий хизмат кўрсатадиган компания ташкил қилинган ва у бу борада тегишли вазирликлардан қўллов кутмоқда. 

“Мен BGI Genomics компаниясининг МДҲ ҳудуди бўйича директориман. Бизнинг компания генетик тест бўйича дунёдаги етакчи компания ҳисобланади.

Ўтган йил ноябрь ойида биз Тошкентда ҳамкорликда ҳомиладорлар ва янги туғилган чақалоқларга тиббий хизмат кўрсатадиган компания ташкил қилдик. Умид қиламанки, Ўзбекистоннинг тегишли вазирликларидан бу борада қўллов оламиз. Биз Ўзбекистонда оналик ва болаликни ҳимоя қилиш, соғлиқни сақлаш тизимини яхшилаш борасида самарали чора-тадбирларни амалга ошира олишимизга ишончимиз комил.

Биз Марказий Осиё давлатлари билан аввалдан ҳамкорлик қилиб келамиз. Масалан, 2020 йилда Қозоғистонга PZR тестлари етказиб бергандик. Бугунгa келиб пандемия тугади, аммо ўшанда ўрнатилган ҳамкорлик биргаликда бошқа лойиҳаларни амалга оширишга кўмак берди. 

Ўзбекистонда ҳам ҳамкорлик кўламини кенгайтириб бормоқдамиз. Масалан, биз Сирдарёдаги скрининг маркази фаолияти билан яқиндан танишдик. У ердаги эскирган тиббий ускуналарни янгиларига алмаштириш бўйича ўзаро ҳамкорлик режалари тузганмиз”, — деди Ченг.