Bank hisobotiga ko‘ra, Markaziy Osiyo mamlakatlari iqtisodlari Rossiyaning Ukrainaga qarshi urushi bilan bog‘liq noxush geosiyosiy hodisalarga chidamliligini ko‘rsatgan.
Yevropa tiklanish va taraqqiyot banki O‘zbekiston iqtisodiyoti 2023 va 2024-yillarda 6,5 foizga o‘sishini prognoz qildi. Bu bo‘yicha bank o‘zining mintaqaviy iqtisodiy prognozida ma’lumot bergan.
Iqtisodiyotning o‘sishiga xorijiy investitsiyalar, kompaniyalar va jismoniy shaxslarning mamlakatga kirib kelishi, yaxshi tashkillangan xususiylashtirish jarayoni va biznes- muhitning isloh qilinishi ta’sir qilishi aytilgan. Bundan tashqari, tashqi bog‘liqlikning nisbatan kuchsizlanishiga qaramay, O‘zbekiston iqtisodiyotiga Rossiyaning Ukrainaga qarshi urushining yanada kuchayishi va pul o‘tkazmalarining qisqarishi qiyinchilik tug‘dirishi mumkinligi qayd etilgan.
Bank Markaziy Osiyo mamlakatlari, jumladan, Qozog‘iston, Qirg‘iziston, Mo‘g‘uliston, Tojikiston, Turkmaniston va O‘zbekiston iqtisodlari 2023-yilda o‘rtacha 5,2 foizga o‘sishini prognoz qilgan. Mintaqa iqtisodiyotining o‘sishiga Rossiyadan korxonalar va jismoniy shaxslarning ko‘chib kelishi, boshqaruvning yaxshilanishi, tovarlar eksportining ko‘payishi va Xitoy bilan yangi aloqalar sabab bo‘lishi qayd etilgan.
Qayd etilishicha, Markaziy Osiyo mamlakatlari iqtisodlari Rossiyaning Ukrainaga qarshi urushi bilan bog‘liq noxush geosiyosiy hodisalarga chidamliligini ko‘rsatgan. Mintaqa iqtisodlarining aksariyati xalqaro firmalarning Rossiya bozoridan chiqib ketishi natijasida yuzaga kelgan bo‘shliqda vositachi bo‘lib, o‘z mahsulotlarini yetkazib berib, Rossiya bilan savdo hamkorligini mustahkamlagan. Markaziy Osiyoga xorijdan pul o‘tkazmalari hajmi ham sezilarli darajada oshgan. Bu esa banklarning depozitlari va foydasi oshishiga xizmat qilgan.
Rossiya firmalari va jismoniy shaxslarining ko‘chib kelishi chakana savdo, ko‘chmas mulk va mehmondo‘stlik sohalarida talabni oshirgan.
Ayni paytda, Rossiyadagi kuchli ishchi kuchi talabi va rublning mustahkamlanishi sabab mehnat muhojirlarining pul o‘tkazmalari ham oshgan. 2023 yilning birinchi choragida mintaqa bo‘ylab o‘sish davom etgan. Lekin aksariyat mamlakatlarda iste’mol narxlari inflyasiyasi markaziy banklar tomonidan belgilangan maqsadli diapazonlardan ancha yuqori bo‘lib qolgan.
Mintaqa iqtisodlari yaqin kelajakda katta ehtimol bilan tez sur’atlarda o‘sishda davom etadi, biroq foiz stavkalari, inflyatsiya va xomashyo narxi bo‘yicha global tendensiyalarga nisbatan noaniqlik saqlanib qolmoqda.
Izoh (0)