Statistikaga ko‘ra, agar ko‘chmas mulk uchun talab va taklif soni barqaror o‘sib borsa, narxlar noaniqligicha qolaveradi. Olx tomonidan “Daryo”ga ma’lum qilinishicha, uy-joy ijarasi bo‘yicha so‘rovlarda poytaxt barcha ko‘rsatkichlar bo‘yicha yetakchi o‘rinni egallab turibdi.
Prognozlash va makroiqtisodiy tadqiqotlar instituti (IPMI) ekspertlari xulosasiga ko‘ra, 2022-yil oktabr oyida Toshkentda kvartira ijarasi narxlarining o‘sishi eng yuqori cho‘qqiga chiqqan va pasayishni boshlagan. “Olx.uz” saytidagi e’lonlar tahliliga ko‘ra, o‘sha paytda, o‘rtacha ta’mirlangan kvartiralarning o‘rtacha ijara narxi 526 dollar atrofida bo‘lgan. Shu yilning mart oyida esa o‘rtacha ijara narxi 411 dollarni tashkil etgan.
Toshkent shahrida joriy yilning yanvar-aprel oylarida vaqtinchalik uy-joyga bo‘lgan iste’mol talabini 2022-yilning shu davri bilan solishtiradigan bo‘lsak, o‘zgarishlar yaqqol ko‘zga tashlanadi. Kvartira ijaraga olishning o‘rtacha oylik narxi taxminan 370 dollarni va uy (dacha, kotej) — 590 dollarni tashkil etadi, o‘tgan yili bu ko‘rsatkich mos ravishda 350-570 dollarni tashkil etgan.
Mamlakat bo‘ylab ijaraga beriladigan uy-joylarning umumiy statistikasiga nazar solsak, unda, talab, taklif va narxlarning aniq o‘zgarishini ko‘rish mumkin. Shuningdek, joriy yilning yanvar-aprel oylarida Olx saytida 135 000 ga yaqin turar-joy binolarini ijaraga berish bo‘yicha (oddiy xonadan pentxausgacha) e’lonlar berilgan. O‘tgan yillarning shu davriga nisbatan bu ko‘rsatkich ancha past: 2022-yilda 96 mingdan, 2021-yilda esa 84 mingdan ortiq joylashtirilgan. Ushbu davr mobaynida kvartiralarning oylik ijarasi uchun o‘rtacha narx taxminan: joriy yil uchun 350-570 dollar, o‘tgan yili 320-550 dollar, 2021-yil uchun esa 300-500 dollarni tashkil etgan.
O‘zbekistonga tashrif buyuruvchilar va istiqomat qiluvchilar soni bo‘yicha poytaxt hali hanuz birinchi o‘rinni egallab kelmoqda. “Olx.uz” saytida o‘tgan yilning yanvar-aprel oylaridan joriy yilning shu davriga nisbatan qidiruv so‘rovlari qariyb 7 barobar oshgan. Bu yilgi davr uchun minimal va maksimal stavkalar kunlik ijara uchun mos ravishda taxminan 30 va 590 dollarni tashkil etgan bo‘lsa, 2022-yilda bu narxlar 20 dan 450 dollargacha bo‘lgan.
Shuningdek, bugungi kunda zamonaviy va ko‘p funksiyali turar-joy majmualarining poytaxtda faol bunyod etilishi uni yangi binolarni sotib olish va ijaraga berishda birinchi o‘ringa olib chiqmoqda. Toshkentda relokantlar ko‘payayotganligi tufayli riyeltorlar bo‘sh uy-joylar haqida ko‘proq e’lon bermoqdalar, bu esa e’lonlar ko‘payishiga yana bir sabab bo‘lmoqda.
Tahlil uchun ma’lumotlar “Olx.uz” saytidan “Parsing” metodi asosida olindi. Joriy yilning yuqorida qayd etilgan davrlari hamda o‘tgan 2022—2021-yillar uchun jami 537 mingdan ortiq saralangan e’lonlar tahlil qilindi.
Izoh (0)