“Ekonazorat”ga yuborilgan qoidabuzarliklar haqida xabar bergani uchun necha kishi rag‘batlantirilgani maʼlum qilindi

Bir yil avval “Ekonazorat” axborot tizimi joriy etilgan edi. Unga ko‘ra, jismoniy shaxslar ekologiya, atrof-muhitni muhofaza qilish va tabiatdan foydalanish sohasidagi huquqbuzarlik aks etgan foto va videomateriallarni tizimga yuborishi va buning evaziga rag‘batlantirilishi ko‘zda tutilgan.

Yuborilgan huquqbuzarlik holati tasdiqlansa, daraxtlar, butalar, boshqa o‘simliklar va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish bo‘yicha — huquqbuzardan undirilgan mablag‘lar hisobidan bazaviy hisoblash miqdorining 1 baravari (330 ming so‘m) miqdorida rag‘batlantiriladi.

Ekologiya, atrof-muhitni muhofaza qilish va tabiatdan foydalanish sohasidagi boshqa huquqbuzarlik bo‘yicha — huquqbuzardan undirilgan jarimaning o‘n besh foizi miqdorida pul mukofoti beriladi.

Tabiat resurslari vazirligi axborot xizmati rahbari Lola Rahmonboyevaning “Daryo”ga maʼlum qilishicha, hozirga qadar “Ekonazorat” axborot tizimi orqali 419 ta foto va videofaktlar kelib tushgan. Shundan 166 ta holat (fuqaroning ismi, familiyasi, otasining ismi, doimiy yashash manzili, uyali telefon raqami, bank plastik kartasi raqami va elektron manzili, huquqbuzarlik sodir etilgan joy, sana va vaqt, huquqbuzarlik sodir etgan shaxs to‘g‘risidagi maʼlumotlar ko‘rsatilmaganligi sababli) o‘z tasdig‘ini topmagan.

Qo‘shimcha qilinishicha, 157 ta holat davlat inspektorlari tomonidan ko‘rib chiqilmoqda,

“Tasdig‘ini topgan 21 ta holat bo‘yicha maʼmuriy ish rasmiylashtirilgan. 17 nafar fuqaro belgilangan tartibda rag‘batlantirilgan”, — deyiladi vazirlik axborotida.

Vazirlik maʼlumotida “Ekonazorat” axborot tizimiga yuborilgan xabarlar uchun qancha summa ajratilgani aytilmagan.