Наманган шаҳрининг Бобур номли боғидаги 12 яшар бола вафот этган аттракцион фаолияти тўхтатиб қўйилди. Бу ҳақда “Дарё” мухбири Азизбек Абдувалиев хабар бермоқда.
Ҳодиса жорий йил 14 май куни содир бўлган. Учқўрғон туманидаги 8-умумтаълим мактаби директори Муяссар Раҳматуллаеванинг билдиришича, 6-синфда таҳсил олаётган бир гуруҳ ўқувчилар ота-оналарининг розилиги билан Наманган шаҳридаги ўлкашунослик музейига олиб борилган. Танишувдан сўнг музей яқинидаги Бобур номли маданият ва истироҳат боғига олиб борилган. Бу ерда аввал музқаймоқ ейишган, кейин аттракционларга боришган. Бахтсиз ҳодиса вагончалардан иборат ва туннеллардан ўтиладиган “Яшил чироқчалар” аттракционида рўй берган.
Фото: Жаҳонгир Акрамов
Ушбу аттракцион назоратчиси Одил Ҳамидуллаевнинг билдиришича, охирги вагончага беш нафар ўғил бола чиққан. Вагонча туннел ичига кириб кетганида улардан бири ўртоғига ёрдам сўраб мурожаат қилган.
Фото: Жаҳонгир Акрамов
“Дарров электрни узиб, ичкарига кирдим. Болалардан бири бошини туннел деворига уриб олган экан. Дарҳол биринчи ёрдам кўрсатдим, сўнг ўзимнинг машинамда тез тиббий ёрдамга олиб бордим. Дастлаб ҳолат яхшидек кўринган эди. Афсуски, ўқувчининг ҳаётини сақлаб қолишнинг имкони бўлмади”, — дейди назоратчи.
Фото: Жаҳонгир Акрамов
Мазкур ҳолат юзасидан Наманган шаҳар прокуратура томонидан Жиноят кодексининг 257-моддаси (меҳнатни муҳофаза қилиш қоидаларини бузиш) билан жиноят иши қўзғатилган. Наманган шаҳар ИИО ФМБ тергов бўлими томонидан тергов ҳаракатлари олиб борилмоқда.
Наманган вилоят ИИБ ахборот хизмати раҳбари Хуршидбек Солиевнинг билдиришича, ҳозирда мазкур аттракцион муҳрланиб, фаолияти тўхтатиб қўйилган. Аттракционнинг техник ҳолати бўйича тегишли экспертизалар тайинланади.
Эслатиб ўтамиз, олдинроқ Тоғ-кон геология ва саноат хавфсизлигини назорат қилиш инспекциясининг айни пайтда Андижон, Наманган, Қашқадарё, Сирдарё, Жиззах ва Тошкент вилоятларида вакиллари йўқ эканлиги ва бу вилоятлардаги мавжуд аттракционлар назорати ҳам очиқлигича қолаётгани маълум қилинганди.
Изоҳ (0)