Toshkentda Amir Temur ko‘chasining bir qismi vaqtincha yopildi

Toshkent shahridagi Amir Temur ko‘chasining bir qismi nomaʼlum muddatga yopildi. Bu haqda poytaxt hokimligi matbuot xizmati xabar berdi.

Qayd etilishicha, ayni kunlarda “Hududiy elektr tarmoqlari” aksiyadorlik jamiyatining shahar filiali Toshkent shahrining elektr taʼminoti tizimini uzluksiz va barqaror ishlashini taʼminlash maqsadida rekonstruksiya va qurilish ishlarini olib bormoqda.

Xususan, Amir Temur ko‘chasi bo‘ylab ham yangi elektr tarmog‘i qurilishi olib boriladi. Shu munosabat bilan 15-maydan to qurilish ishlari yakunlanguniga qadar Amir Temur shoh ko‘chasining Nukus ko‘chasi bilan kesishmasidan Amir Temur ko‘chasi bo‘ylab Shahrisabz ko‘chasi kesishmasigacha bo‘lgan oraliqda yo‘lning bir tasmasi vaqtincha yopiladi.

Bunga qadar velosportning shosse turi bo‘yicha Oqtosh—Chorbog‘ Mountain xalqaro musobaqasi o‘tkazilishi munosabati bilan 10 ,11, 13, 14-may kunlari soat 08:00 dan 17:00 ga qadar Toshkent viloyatining Bo‘stonliq va Yuqori Chirchiq tumanlaridan o‘tgan avtomobil yo‘llari vaqtinchalik yopilgandi. 19-fevral kuni esa “Men g‘olib” ommaviy yugurish musobaqasi o‘tkazilishi munosabati bilan Toshkentning qator ko‘chalarida avtomobillar harakatlanishiga vaqtinchalik cheklov qo‘yilgandi. Toshkentda marafon o‘tkazilishi munosabati bilan 5-mart kuni bir qator ko‘chalar yopilgan edi.