Марказий сайлов комиссиясининг муддатидан илгари Ўзбекистон президенти сайловига бағишланган навбатдаги мажлиси бўлиб ўтди.
МСК маълумотига кўра, сиёсий партияларнинг ваколатли вакиллари иштирок этган мажлисда партияларнинг муддатидан илгари Ўзбекистон президенти сайловида иштирок этишига ижозат бериш тўғрисидаги масала кўриб чиқилган.
Сайлов кодексига мувофиқ Марказий сайлов комиссияси томонидан Ўзбекистон Халқ демократик партияси, Тадбиркорлар ва ишбилармонлар ҳаракати – Ўзбекистон либерал-демократик партияси, Ўзбекистон “Адолат” социал-демократик партияси, Ўзбекистон Экологик партияси ҳамда Ўзбекистон “Миллий тикланиш” демократик партиясининг муддатидан илгари президент сайловида иштирок этишга ижозат беришни сўраб тақдим қилган ҳужжатларини кўриб чиқиб, мазкур партияларга 2023 йил 9 июль куни бўлиб ўтадиган сайловларда иштирок этиши учун ижозат берилган ва тегишли қарорлар қабул қилинган.
Шунингдек, мажлис доирасида, сиёсий партияларнинг ваколатли вакилларига сайловда иштирок этишга ижозат берилгани тўғрисидаги гувоҳнома ҳамда белгиланган намунадаги имзо варақалари бланкалари топширилган.
Мажлисда қабул қилинган қарорлар Марказий сайлов комиссиясининг веб-сайтига жойлаштирилади ҳамда улар тўғрисидаги маълумотлар марказий матбуотда эълон қилинади.
Муддатидан илгари Ўзбекистон президенти сайлови
“Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун 6 май куни президент томонидан имзоланди. Сайлов кодексига киритилган ўзгартиришларга кўра президент муддатидан илгари Ўзбекистон президенти сайловини тайинлаган тақдирда, сайлов ушбу кодексга тўлиқ мувофиқ ҳолда 2 ой ичида ўтказилади. Бунда сайловга тайёргарлик кўриш ҳамда уни ўтказишга доир тадбирларни амалга ошириш муддатлари Марказий сайлов комиссияси томонидан белгиланади.
Изоҳ (0)