Dushanbe xalqaro aeroportiga 15-may kuni Meksikadan 92 million dollarga sotib olingan Boeing 787-8 Dreamliner samolyoti yetib keldi. Biroq tojik rasmiylari bu borada biron sharh va izoh bermadi. Bu haqda “Daryo”ning Tojikistondagi muxbiri xabar berdi.
Samolyotlar parvozini to‘g‘ridan to‘g‘ri eʼlon qiluvchi Flight Radar bazasining tasdiqlashicha, aviatexnika “EY-001” ramzi bilan San-Bernardinodan uchishni boshlagan va ertalab soat 07:36 da Dushanbe xalqaro aeroportiga qo‘ngan.
Samolyotlarning tekshiruvi, bo‘yash va ijaraga berish ishlari bilan shug‘ullanuvchi Nomadic Aviation Group shirkatining masʼullaridan biri Bob Alen 14-may kuni Twitter sahifasida mazkur samolyotning ichki va tashqi qismlaridan olingan suratlarni joylashtirgan. U Boeing 787-8 Dreamliner samolyotiga Tojikiston nomi va davlat belgilari qo‘yilganidan keyin Dushanbe shahriga jo‘natilishini aytgan.
Meksika sobiq prezidentiga tegishli ushbu samolyot AQSHning Arizona shtatidagi San-Berdardinoda Tojikiston nomi va davlat belgilari bilan bo‘yalgan. Oldin Tojikiston OAV tomonidan ushbu samolyot davlat rahbari Emomali Rahmonning xorijiy safarlari uchun sotib olinishi borasida xabarlar eʼlon qilingan.
Samolyotdagi bayroq, gerb va mamlakat nomi kabi belgi va bo‘yoqlar avvallari faqat prezident safarlari uchun xos va birinchi raqamli samolyotlarda kuzatilgan. Ammo ushbu aviatexnikani Dushanbe hukumati yoki biror shirkat alohida sotib olgani bo‘yicha mutasaddi idora va masʼul shaxslar aniq javob bermagan.
Eslatib o‘tamiz, 2023-yilning 21-aprelida Meksika prezidenti Lopez Obrador Twitter sahifasida 2012-yili mamlakat prezidenti uchun sotib olingan samolyot Tojikiston davlatiga sotilishini eʼlon qilgandi. Mazkur samolyotning qiymati 218 million dollarni tashkil qilsa-da, Tojikistonga 92 million dollarga sotilgan.
Meksika prezidenti samolyot uchun olingan ushbu pullarga qoloq bo‘lgan Gerrero va Oaksaka shtatlarida shifoxonalar qurilishini taʼkidlagandi. Boeing 787-8 Dreamliner kabi samolyotlarni asosan davlat rahbarlari va yoki xususiy aviakompaniyalarga ega puldorlar sotib oladi. Mazkur samolyot xaridorining kimligi aniq bo‘lmagani bois ijtimoiy tarmoqlarda qizg‘in bahslar ketmoqda.
Izoh (0)