Tojikiston Din ishlari bo‘yicha qo‘mitasi mamlakatda ramazon hayiti 21-aprel kuni nishonlanishini ma’lum qildi. Bu haqda qo‘mita matbuot xizmati xabar berdi.
Ma’lum qilinishicha, ramazon oyi tugashi munosabati bilan bayram namozi 21-aprel kuni respublikadagi barcha masjidlarda mahalliy vaqt bilan soat 06:30 da o‘qiladi. Dindorlar bayramda muhtojlarga yordam berishga, isrofgarchilik qilmaslikka chaqirilmoqda.
Avvalroq Musulmonlar idorasi O‘zbekistonda ramazon hayitini nishonlash sanasi qachon rasman e’lon qilinishiga oydinlik kiritgan edi. Jumladan, ramazon hayitining birinchi kuni haqidagi ma’lumotlar Ulamolar Kengashi tomonidan ko‘rib chiqilishi va tegishli xulosalar qabul qilinishi bildirilgan.
“Taniqli ulamolar va malakali mutaxassislardan iborat mazkur ishchi guruh Ramazon hayitining birinchi kuni – Shavvol hilolini astronomik tahlillar hamda xorijiy davlatlardagi mutaxassislar bilan hamkorlik asosida kuzatishmoqda”, — deyiladi Musulmonlar idorasi xabarida.
Izoh (0)