Душанбе халқаро аэропортига 15 май куни Мексикадан 92 миллион долларга сотиб олинган Boeing 787-8 Dreamliner самолёти етиб келди. Бироқ тожик расмийлари бу борада бирон шарҳ ва изоҳ бермади. Бу ҳақда “Дарё”нинг Тожикистондаги мухбири хабар берди.
Самолётлар парвозини тўғридан тўғри эълон қилувчи Flight Radar базасининг тасдиқлашича, авиатехника “EY-001” рамзи билан Сан-Бернардинодан учишни бошлаган ва эрталаб соат 07:36 да Душанбе халқаро аэропортига қўнган.
Самолётларнинг текшируви, бўяш ва ижарага бериш ишлари билан шуғулланувчи Nomadic Aviation Group ширкатининг масъулларидан бири Боб Ален 14 май куни Twitter саҳифасида мазкур самолётнинг ички ва ташқи қисмларидан олинган суратларни жойлаштирган. У Boeing 787-8 Dreamliner самолётига Тожикистон номи ва давлат белгилари қўйилганидан кейин Душанбе шаҳрига жўнатилишини айтган.
Мексика собиқ президентига тегишли ушбу самолёт АҚШнинг Аризона штатидаги Сан-Бердардинода Тожикистон номи ва давлат белгилари билан бўялган. Олдин Тожикистон ОАВ томонидан ушбу самолёт давлат раҳбари Эмомали Раҳмоннинг хорижий сафарлари учун сотиб олиниши борасида хабарлар эълон қилинган.
Самолётдаги байроқ, герб ва мамлакат номи каби белги ва бўёқлар авваллари фақат президент сафарлари учун хос ва биринчи рақамли самолётларда кузатилган. Аммо ушбу авиатехникани Душанбе ҳукумати ёки бирор ширкат алоҳида сотиб олгани бўйича мутасадди идора ва масъул шахслар аниқ жавоб бермаган.
Эслатиб ўтамиз, 2023 йилнинг 21 апрелида Мексика президенти Лопез Обрадор Twitter саҳифасида 2012 йили мамлакат президенти учун сотиб олинган самолёт Тожикистон давлатига сотилишини эълон қилганди. Мазкур самолётнинг қиймати 218 миллион долларни ташкил қилса-да, Тожикистонга 92 миллион долларга сотилган.
Мексика президенти самолёт учун олинган ушбу пулларга қолоқ бўлган Герреро ва Оаксака штатларида шифохоналар қурилишини таъкидлаганди. Boeing 787-8 Dreamliner каби самолётларни асосан давлат раҳбарлари ва ёки хусусий авиакомпанияларга эга пулдорлар сотиб олади. Мазкур самолёт харидорининг кимлиги аниқ бўлмагани боис ижтимоий тармоқларда қизғин баҳслар кетмоқда.
Изоҳ (0)