O‘zbekistonda 2023/2024-o‘quv yili uchun test sinovlari o‘tkaziladigan 92 ta yopiq inshoot tanlab olindi. Bu haqda Oliy ta’lim, fan va innovatsiyalar vazirligi matbuot xizmati xabar berdi.
Qayd etilishicha, oliy taʼlim, fan va innovatsiyalar vaziri Ibrohim Abdurahmonov rahbarligida vazirlik huzuridagi Bilim va malakalarni baholash agentligi faoliyatidagi tizimli muammolar va ularning yechimlariga bag‘ishlangan yig‘ilish o‘tkazilgan. Unda respublika oliy taʼlim muassasalariga o‘qishga qabul qilish bo‘yicha test sinovlarini tashkil qilish yuzasidan amalga oshirilayotgan ishlar muhokama qilingan.
Ma’lumotlarga ko‘ra, 2023-yilning o‘tgan davri mobaynida jami 15 dan ortiq turdagi test sinovlari o‘tkazilgan va ularda 140 ming nafardan ortiq talabgor ishtirok etgan. Shuningdek, xorijiy davlatlarda olingan taʼlim to‘g‘risidagi hujjatlarni tan olish bo‘yicha 1 180 nafar talabgorning taʼlim hujjatlari ko‘rib chiqilgan, taʼlim sohasi tashkilotlari tomonidan berilgan 5 510 ta rasmiy hujjatga apostil qo‘yilgan.
Test sinovlarini o‘tkazishga mo‘ljallangan alohida binolarning mavjud emasligi sababli o‘tkazilayotgan aksariyat test sinovlari taʼlim muassasalari o‘quv binolarida taʼlim jarayoniga xalaqit qilmaslik uchun haftaning dam olish (shanba va yakshanba) kunlarida o‘tkazilmoqda.
Yig‘ilishda, shuningdek, agentlik faoliyatiga doir o‘z yechimini kutayotgan masalalar, xususan, joylarda test sinovlarini yil davomida o‘tkazish uchun katta sig‘imli binolarni qurishdagi ayrim kamchiliklar qayd etilib, ularni bartaraf etish choralari bo‘yicha takliflar berilgan. Mutasaddilarga optik skaner va ularga ehtiyot qismlar xarid qilishni tezlashtirish topshirilgan.
2023/2024-o‘quv yili uchun test sinovlari o‘tkaziladigan 92 ta yopiq inshoot tanlab olingan hamda ularning reja chizmalari tayyorlanib, mahalliy hokimlik va idoralar bilan kelishilgan holda tasdiqlangan.
Bundan tashqari, test sinovlari o‘tkaziladigan 15 ta umumtaʼlim fanidan 26 520 ta va qardosh (qozoq, qirg‘iz, tojik, turkman) tillardan 2 400 ta test topshirig‘i shakllantirilgan va ekspertizadan o‘tkazilgan. Keng jamoatchilik orasidan test sinovlarida guruh nazoratchiligiga nomzod sifatida ro‘yxatdan o‘tgan 8 956 nafar talabgordan 4 000 nafarga yaqini saralab olindi va ular bilan shartnomalar rasmiylashtirilmoqda.
Stadionlarda o‘tkazilgan test sinovlari
2020/2021-o‘quv yili uchun oliy ta’lim muassasalarining bakalavriat ta’lim yo‘nalishlariga kirish test sinovlari ochiq maydonlarda tashkil etilgandi. Shu sababli o‘shanda abituriyentlar xohishiga ko‘ra test sinovlariga bosh kiyim (kepka) bilan kelishlari mumkinligini bildirilgan. 2-sentabrda Farg‘onada imtihonga kelgan abituriyentlarga do‘ppi tarqatilgandi.
2021-yilning avgust oyi boshida O‘zbekiston Davlat test markazining rasmiy veb-saytiga 2021/2022-o‘quv yili uchun oliy ta’lim muassasalarining bakalavriat ta’lim yo‘nalishlariga kirish test sinovlari o‘tkaziladigan stadion va xiyobonlar bo‘yicha ma’lumotlar e’lon qilingandi. Xususan, Toshkent shahrida OTMlarga kirish imtihonlari “Paxtakor” va “Bunyodkor” stadionlari, shuningdek, “G‘alaba” va “Botanika” bog‘larida bo‘lib o‘tgandi. 2022-yilda ham OTMlarga kirish imtihonlari ochiq havoda o‘tkazildi.
Izoh (0)