Samarqandda Yevropa tiklanish va taraqqiyot banki Boshqaruvchilar kengashining yillik yig‘ilishi o‘tkaziladi

Samarqandda 16-18-may kunlari Yevropa tiklanish va taraqqiyot banki (YTTB) Boshqaruvchilar kengashining “Iqtisodiy chidamlilik va barqarorlikka investitsiyalar kiritish” mavzusidagi 32-yillik yig‘ilishi bo‘lib o‘tadi. Bu haqda “Dunyo” agentligi xabar berdi.

Tadbirda 73 davlatdan 2 mingdan ortiq mehmonlar, jumladan, xorijiy hukumatlar vakillari, transmilliy korporatsiyalar, xalqaro moliya institut va banklari rahbarlari, iqtisodiyot, investitsiyalar, moliya va texnologiya sohasidagi ekspertlar, shuningdek, yetakchi xorijiy OAV vakillari ishtirok etishi kutilmoqda.

Iqtisodiy barqarorlikka investitsiyalar kiritish masalalari tadbirning asosiy mavzusi bo‘ladi. Yig‘ilish davomida Bankka aʼzo mamlakatlar duch kelayotgan muammolarni bartaraf etish bo‘yicha chora-tadbirlarni ishlab chiqish mavzulariga bag‘ishlangan panel munozaralari o‘tkazilishi ham rejalashtirilgan.

Tadbir, shuningdek, YTTBga o‘tgan yil davomida erishgan yutuqlarini tahlil qilish va rejalar tuzish imkoniyatini beradi. Yig‘ilish asosiy tadbirlaridan biri “O‘zbekistonning investitsiyaviy istiqbollari to‘g‘risida”gi sessiya bo‘ladi. Unda mamlakat iqtisodiyotining kutilayotgan o‘sish surʼatlari va investitsiyalarni jalb etish imkoniyatlari muhokama qilinadi.

Tadbirning uch kunlik kun tartibidan ekspertlar ishtirokidagi turli mavzularda mintaqalar va alohida mamlakatlarga bag‘ishlangan bir qator panel munozaralari ham o‘rin olgan.

Ular qatoridan:

• xalqaro savdo munosabatlari;
• energiya xavfsizligi va qayta tiklanadigan energiya manbalari;
• kichik va o‘rta biznesning iqtisodiyotdagi ahamiyati;
• rivojlanayotgan bozorlarda raqamlashtirish jarayonlari;
• YTTB “Yashil shaharlar” dasturi;
• YTTBning “Mintaqaviy iqtisodiy istiqbollar” mavzusidagi asosiy makroiqtisodiy tadqiqoti va boshqalar o‘rin olgan.

Shuningdek, yig‘ilish davomida xalqaro ishbilarmon doira vakillari ishtirokida biznes-forum bo‘lib o‘tadi. Unda makroiqtisodiy vaziyat, qayta tiklanadigan energiya manbalarini rivojlantirishda xususiy sektor va davlatning roli, hududlararo aloqalar, iqtisodiy integratsiya, oziq-ovqat xavfsizligi, raqamlashtirish va boshqa masalalar yuzasidan ekspert muhokamalari o‘tkaziladi.

O‘zbekiston tomonidan ushbu tadbirni o‘tkazish uchun ariza 2019-yilda berilgan va 2022-yilda tasdiqlangan.