Toshkentda sayohat uchun BAAga yuborishni va’da qilib, fuqaroni chuv tushirgan soxta turistik agentligi faoliyatiga chek qo‘yildi. Bu haqda IIV Kiberxavfsizlik markazi xabar berdi.
Qayd etilishicha, Yunusobod tumanida yashovchi 26 yoshli M.T. ariza bilan murojaat qilib, Telegram messenjerida nomaʼlum shaxs bilan tanishib, BAAga sayohat uchun tur-paket sotib olish maqsadida uning plastik kartasiga jami 20 million 950 ming so‘m pulni o‘tkazib bergandan so‘ng, ushbu shaxs vaʼdasini bajarmaganini maʼlum qilgan.
Olib borilgan tezkor-qidiruv tadbirlari natijasida, ushbu firibgarlik jinoyatini Toshkent viloyati Olmaliq shahrida yashovchi 27 yoshli M.M. sodir etgani aniqlangan.
Ma’lumotlarga ko‘ra, M.M. Telegram messenjerida “Jahongir” nomli akkaunt ochib, World-Travel nomli guruh yaratib, unda dunyoning turli mamlakatlariga sayohat safarlarini tashkil qilib berish xizmatlarini taklif qilgan holda aldovlariga ishongan fuqarolarning pullarini o‘zlashtirib kelgani maʼlum bo‘lgan.
Jinoyat sodir etgan M.M. Jinoyat kodeksining 168-moddasi (firibgarlik) 3-qismi “g” bandi bilan jinoiy javobgarlikka tortilgan. Qonunga muvofiq, A.J. tomonidan sodir etilgan jinoiy harakatlar uchun 5 yildan 8 yilgacha ozodlikdan mahrum qilish jazosi nazarda tutilgan.
Izoh (0)