Қозоғистон президенти Қосим-Жўмарт Тўқаев Хитойга давлат ташрифи арафасида мамлакатнинг CCTV телеканалига интервью берди. Унда сиёсатчи Хитой ва Марказий Осиё яқинлашуви ҳақида гапирди. 

Тўқаев Қозоғистоннинг тарихий тақдири тинч бўлиши, барча давлатлар билан, аввало, энг яқин қўшнилар билан дўстона муносабатлардан манфаат кўришини таъкидлади.

“Хитой ташқи сиёсатимизда жуда муҳим ўрин тутади. 2019 йил сентябр ойида Хитойга давлат ташрифи билан бордим. Си Цзиньпин билан ажойиб музокаралар олиб бордик. Халқларимизни бир-бирига яқинлаштириш бўйича ўзаро манфаатли сиёсат олиб боришга келишиб олдик.

Демак, икки давлат ўртасидаги стратегик шериклик, азалий дўстликни ривожлантиришимиз керак. Менимча, бу кўп жиҳатдан қозоқ халқининг манфаатларига, узоқ муддатли манфаатларига тўғри келади ва мен бу сиёсатга қатъий содиқман. Албатта, биз энг яқин қўшнимиз – Хитой билан стратегик шериклик муҳимлигига шубҳа қилмаймиз”, — деди Қозоғистон президенти.

Журналист Қозоғистон президентидан Хитой ва Марказий Осиёнинг тобора яқинлашиб бораётганидан хавотирда бўлганларнинг изоҳларига жавоб беришни сўради.

“Бу борада ҳеч қандай шубҳа бўлмаслиги керак, чунки бизнинг ниятларимиз жуда очиқ ва самимий. Гап шундаки, Хитой ўз иқтисодиёти бўйича дунёда иккинчи ўринда туради, шунинг учун биз Хитойнинг ролини тан олишимиз ва у билан жуда яхши муносабатлар ўрнатишимиз керак”, — деди Қосим-Жўмарт Тўқаев.

Давлат раҳбари икки томонлама иқтисодий алоқаларни ривожлантириш ниятида эканини таъкидлади ва стратегик ҳамкорликка оид саволга ҳам жавоб берди.

“Хитой Марказий Осиёда тобора муҳим рол ўйнамоқда ва бу табиий ҳол. Ўйлайманки, Марказий Осиёдаги барча ҳамкасбларим Хитой билан муносабатларимиздан наф кўряпмиз, деган фикрга қўшилади. Бундай ҳамкорликни ривожлантириш учун қўлимиздан келганини қиламиз”, — таъкидлади Тўқаев.