“Adolat” partiyasi o‘zbek huquqshunosi, sudya va senator Robaxon Mahmudovani 2023-yilgi prezidentlik sayloviga nomzod sifatida ko‘rsatgan edi. Oliy sud uning sudyalik vakolati tugatilganini maʼlum qildi.
Qonunchilikka ko‘ra, sudya siyosiy faoliyat bilan shug‘ullanishga haqli emas. Saylov kodeksiga asosan siyosiy partiya O‘zbekiston prezidentligiga o‘z partiyasi aʼzolari orasidan yoki partiyasizni nomzod etib ko‘rsatishga vakolatlidir.
Shu munosabat bilan 12-may kuni Sudyalar oliy malaka hayʼati Robaxon Mahmudovaning arizasi va sud qonunchiligiga muvofiq Oliy sud raisining birinchi o‘rinbosari — maʼmuriy sudlov hayʼatining raisi Robaxon Mahmudovaning sudyalik vakolatlarini to‘xtatib turish haqida qaror qabul qildi.
Robaxon Anvarovna — o‘zbek huquqshunosi, sudya va senator. 2020-yilda u Oliy Majlis Senatining a’zosi etib saylangan. 2020-yil 13-iyuldan boshlab u Oliy sud raisining birinchi o‘rinbosari lavozimini egallab kelmoqda.
U, shuningdek, Farg‘ona viloyati Jinoyat ishlari bo‘yicha sud raisi, 2008-yil 29-avgustgacha esa O‘zbekiston Respublikasi Oliy sudining sudyasi lavozimida ishlagan. 2017-yildan 2020-yilgacha O‘zbekiston prezidentining Farg‘ona viloyatidagi Xalq qabulxonalari rahbari sifatida ishlagan.
Izoh (0)