Andijonda qulupnay sotuvchisini urib, uning o‘limiga sababchi bo‘lgan fuqaroga nisbatan jinoyat ishi qo‘zg‘atildi. Bu haqda “Daryo” muxbiri xabar bermoqda.
Bosh prokuratura axborot xizmatining “Daryo” muxbiriga ma’lumot berishicha, 29-aprel kuni soat 17:30 larda fuqaro A.I. Jalaquduq tumani “Bozorboshi” mahallasida joylashgan buyum bozorining kirish yo‘lagida meva sotayotgan sotuvchi P.A. bilan qulupnay mahsulotining narxi yuzasidan o‘zaro janjallashib qolgan. Shunda fuqaro A.I. qo‘li bilan sotuvchining yuz qismiga bir marotaba urgan. Oqibatda P.A. yerga yiqilib, sud-tibbiy ekspertizasining dastlabki maʼlumotnomasiga ko‘ra “o‘rtacha og‘ir” tan jarohati olgan.
Mazkur holat yuzasidan 30-aprel kuni tuman prokuraturasi tomonidan A.A.ga nisbatan Jinoyat kodeksining 105-moddasi 1-qismi (qasddan badanga o‘rtacha og‘ir shikast yetkazish) bilan jinoyat ishi qo‘zg‘atilgan.
Jinoyat ishi bo‘yicha dastlabki tergov harakatlari olib borilayotgan vaqtda P.A. ko‘rsatilgan tibbiy muolajalarga qaramasdan, 9-may kuni olgan tan jarohatlari natijasida Jalaquduq tuman tibbiyot birlashmasining jonlantirish bo‘limida vafot etgan.
Dastlabki tergov davomida A.I.ning harakatlari shu kunning o‘zidayoq Jinoyat kodeksining 104-modda (qasddan badanga og‘ir shikast yetkazish) 3-qismi “d” bandiga qayta malakalangan. Gumonlanuvchi Jinoyat protsessual kodeksining 221-moddasi tartibida ushlanib, unga nisbatan qamoqqa olish ehtiyot chorasi qo‘llanilgan.
Izoh (0)