Қашқадарё вилояти Қамаши туманидаги бозорда ҳуқуқ-тартибот идоралари ходимлари Ўзбекистон байроғи рангидаги ва “Битирувчи” ёзуви бўлган тасма таққан йигитни қўлга олганди. “Юксалиш” ушбу иш бўйича тафсилотларни очиқлашга чақирди.
5 май куни Қашқадарё вилояти ИИБ фуқаро Р.И. ушбу тасмани ечиб қўйиш бўйича профилактика инспекторларининг қонуний талабларига бўйсунмаганини, ҳолат юзасидан фуқарога тегишли моддалар билан ҳужжатлар расмийлаштирилганини ҳамда жиноят ишлари бўйича Қамаши туман судига юборилганини маълум қилди.
“Кейинроқ эса маъмурий ҳуқуқбузарлик тўғрисида иш қўзғатиш ҳақида қабул қилинган ноқонуний қарор Бош прокуратура аралашуви билан бекор қилинди, байроқ рангидаги тасма таққан йигитнинг ноқонуний жазоланиши бартараф этилди. Адолат қарор топди.
Бироқ фуқарога ноқонуний талаб қўйган, тегишли ҳужжатларни расмийлаштирган ва жавобгарликка тортиш учун судга юборган ИИБ ходимлари ҳамда ноқонуний қарор қабул қилган суднинг ҳаракатларига қандай баҳо берилгани масаласи мавҳумлигича қолмоқда.
Бошқача айтганда, адолат қарор топди, бироқ қонун устуворлиги тўлақонли таъминландими, деган савол очиқ қолмоқда. 8 май куни референдум натижаларига бағишланган учрашувда президент барча соҳаларда қонун устуворлиги таъминланиши, қонунлардаги ноаниқликлар инсон фойдасига ҳал бўлиши, ҳар қандай ҳолатда адолатни қарор топтириш шарт деган қараш мансабдорлар учун ҳаёт қоидасига айланиши кераклигини таъкидлади.
Шу муносабат билан, кенг жамоатчиликнинг ва “Юксалиш” ҳаракати аъзоларининг мурожаатларига асосланиб, тегишли идоралар масала юзасидан батафсил ахборот бериши мақсадга мувофиқ, деб ҳисоблаймиз», — дейилади ҳаракат раҳбари Бобур Бекмуродов томонидан эълон қилинган постда.
2022 йил ноябрда Қонунчилик палатасидаги ЎзЛиДеП фракциясининг кенгайтирилган йиғилишида “Ўзбекистон Республикасининг Давлат байроғи тўғрисида”ги қонунга тегишли ўзгартиш ва қўшимчалар киритиш ташаббусини илгари суриб, муҳокама ташкил этиш ва депутатлар орасидан ишчи гуруҳ тузиш кўзда тутилгани маълум бўлганди. Ўшанда ЎзЛиДеп лидери Актам Ҳайитов байроқ Ўзбекистон суверенитетининг рамзи эканини қайд этиб, байроқнинг кундалик ҳаётда доимий ҳамроҳга айланиши давлатда яшовчи барча миллат ва элат вакилларини жипслаштиришда муҳим ўрин тутишини таъкидлаган.
Изоҳ (0)