UzAuto Motors Chevrolet Onix va Tracker avtomobillari sotuvini to‘xtatgani xabar qilingandi. Kompaniya vakili “Daryo”ga mazkur rusumdagi avtomobillar sotuvi joriy haftada tiklanishini aytgan. Hozirda aholi narxlari 420 million so‘mdan 1,1 milliard so‘mgacha bo‘lgan Malibu, Equinox, Traverse va Tahoe mashinalarini xarid qilishi mumkin.
UzAuto Motors 2022-yilda hamyonbop modellardan Spark, Nexia, Cobalt va Lacetti avtomobillari sotuvini to‘xtatib, Onix va Tracker uchun shartnomalar tuzishni boshlangandi. Biroq, joriy yil may oyi boshidan narxi 207 million so‘mlik Onix va 211 million so‘mlik Tracker sotuvi to‘xtab qolgan. Hozirda kompaniyadan narxlari 420 million so‘mdan 1,1 milliard so‘mgacha bo‘lgan Malibu, Equinox, Traverse va Tahoe avtomobillarini xarid qilish mumkin.
“Autostrada.uz” nashrining yozishicha, kompaniya hamyonbop modellar uchun shartnomalar tuzishni to‘xtatish orqali avtomobillar narxlarini oshirishi mumkin.
“Odatda shartnomalar chiqarishni tugatish inventarizatsiya va keyinchalik narxlarning oshishi vaqtida sodir bo‘ladi. Oxirgi 5 yil ichida UzAuto Motors turli bahonalar bilan narxlarni oshirishdan avval avtomobillar savdosini to‘xtatgan”, — deya xabar bergan manba.
Kompaniya vakilining “Daryo”ga maʼlum qilishicha, Onix va Tracker sotilmayotgani mazkur modellar jihozlarining yangilanayotgani bilan bog‘liq.
“Tracker va Onix qo‘shimcha variantlar bilan sotuvga chiqariladi. Yangi variantlarda isitiladigan tashqi nometall, old o‘rindiqlar, tozalash zonasi, ikkinchi qator o‘rindiqlari, rul, olti tomonlama sozlanishi haydovchi o‘rindig‘i, karter himoyasi, Redline paketi bo‘ladi. Hozir yangi konfiguratsiyalar bo‘yicha shartnomalar ochilishiga tayyorgarlik ko‘ryapmiz”, — deyiladi vakil izohida.
Qo‘shimcha qilinishicha, yangi variantdagi avtomobillar narxlari avvalgisidan farq qiladi. Ammo mashinalar qimmatlashishi yoki arzonlashishi to‘g‘risida maʼlumot berilmagan. Sotuv esa joriy haftada tiklanishi kutilmoqda.
UzAuto Motors’ning hamyonbop narxlardagi avtomobillarning sotuvdan olinishiga ijtimoiy tarmoq faollari ham munosabat bildirdi.
Iqtisodchi Otabek Bakirovning yozishicha, hozirda nafaqat kam daromadli, balki o‘rta daromadli aholiga ham avtomobil sotib olishda tanlov yo‘qolgan.
“Endi nafaqat kam daromadli va o‘rtadan past, balki, o‘rta va o‘rtadan yuqori daromad egalari bo‘lgan o‘zbekistonliklar ham avtomobil sotib olishning tanlovsiz, yagona variantidan mosuvo bo‘lishdi. Hukumat aynan kam va o‘rta budjetli avtomobillar uchun juda yuqori boj to‘lovlari va cheklovlarini belgilagan. Qizig‘i, o‘zbekistonlik isteʼmolchilarga tupurib qo‘ygan monopolist UzAuto Motors erkin bozorlar hisoblangan Qozog‘iston, Qirg‘iziston va Ozarboyjonda yangi va yangi ishlab chiqarish quvvatlarini tashkil etmoqda va kengaytirmoqda. O‘zbekistonliklarga yo‘q mashina, sanalgan davlatlar xaridorlari uchun bor va bemalol”, — deya fikr bildirgan iqtisodchi.
Telegramdagi Davletov.uz kanali muallifi Qobil Hidirov shartnomalar qayta tiklansa, narxlar oshishi mumkinligini taxmin qildi.
“UzAuto Motors Chevrolet Onix va Tracker avtomobillari uchun shartnoma berishni to‘xtatgan. Kompaniya buni yangi komplektatsiyadagi modellar uchun shartnomalar tez kunda ochilishi bilan izohlagan. Bunda isitish tizimi opsiyalari qo‘shilishi va redlayn pozitsiyalari nazarda tutilgan. Aftidan, narxlar yana oshadi”, — deb yozadi u.
Kompaniya rasmiy sayti yoki ijtimoiy tarmoqlardagi sahifalari orqali Onix va Tracker avtomobillari uchun shartnoma berish to‘xtatilgani, sotuv qayta tiklansa, narxlar qanday bo‘lishi haqida xabar bermagan.
Maʼlumot uchun, O‘zbekistonda Onix va Tracker avtomobillari ishlab chiqarilishi mumkinligi haqida ilk bor 2019-yil iyunida maʼlum bo‘lgandi. Onix ilk bor sotuvga chiqqan 2022-yil 1-noyabr kuni avtomobil uchun rekord darajadagi — 28 mingdan ortiq shartnoma imzolangandi. Dastlab, Chevrolet Onix 9-12 ming dollar atrofida sotilishi xabar qilingan. Ammo shartnomalar to‘xtatilgunga qadar avtomobil 18 ming dollardan sotilgan.
Izoh (0)