Жорий йилнинг 5 май куни Лондонда Давлат-хусусий шериклик (ДXШ) соҳасидаги нуфузли Partnership Awards 2023 халқаро мукофотини топшириш маросими бўлиб ўтди. Тадбирда Ўзбекистоннинг “Наманган шаҳридаги оқова сув тозалаш иншоотлари”ни қуриш лойиҳаси “Коммунал секторнинг энг яхши лойиҳаси” номинациясида ғолиб деб топилди. Бу ҳақда Иқтисодиёт ва молия вазирлиги хабар берди.
Маълум қилинишича, “Наманган шаҳрининг оқова сувларини тозалаш иншоотлари” лойиҳаси республикада ичимлик суви таъминоти ва оқова сув хизматларини кўрсатиш бўйича ДXШнинг тажриба лойиҳаси ҳисобланади. Лойиҳа тендерида 23 та компания иштирок этган бўлиб, икки босқичли тендер очиқ ва шаффоф тарзда ўтказилган. Тендер натижаларига кўра, шартнома Мetitо компаниясига тақдим этилди. Компания БААда жойлашган бўлиб, сув ресурсларини бошқариш ечимларини етказиб берувчи глобал инвестор ҳисобланади.
“Наманган шаҳрининг оқова сувларни тозалаш иншоотлари” лойиҳаси кунига 100 минг куб метр бўлган янги оқова сувларни тозалаш имкониятига эга бўлади. Лойиҳа шаҳар ва унинг атрофидаги бешта туманга хизмат кўрсатадиган 7,5 километр узунликдаги оқова сув тармоғини қуришни назарда тутади. Лойиҳа амалга оширилиши натижасида ҳудуддаги 1,8 миллион нафаргача бўлган аҳолига тўлақонли хизмат кўрсатиш имконияти яратилади. Partnership Awards мукофотига лойиқ кўрилиши лойиҳанинг илғор халқаро ДXШ стандартларига мувофиқ амалга оширилишини, унинг ижтимоий ва экологик аҳамияти юқори эканини кўрсатади. Шунингдек, лойиҳанинг барча иштирокчилари томонидан амалга оширилган ишларнинг юқори самарадорлигини ва секторда қабул қилинган лойиҳа қарорларини акс эттиради”, — дейилади хабарда.
Иқтисодиёт ва молия вазири ўринбосари Илҳом Норқулов мазкур халқаро мукофоти юзасидан ўз фикрларини билдириб, Ўзбекистон ДXШ дастури мамлакатимиз учун бурилиш нуқтаси эканини эътироф этган.ю
“Хусусий сектор билан ҳамкорлик туфайли талаб юқори бўлган инфратузилма лойиҳаларини амалга ошириш учун зарур капитални молиявий ва ресурс билан таъминлашни сезиларли даражада оширмоқдамиз. Ушбу лойиҳалар туфайли бугунги кунда олдимизда турган ижтимоий аҳамиятга эга муаммоларни янада самарали ҳал этишга ҳисса қўшмоқдамиз. Энг муҳими, биз бу жараёнда тажриба алмашамиз ва янги имкониятларни очиб беришга имкон берадиган глобал стандартлар ва инновациялар билан маҳаллий танишувимизни тарғиб қиламиз.
Бизда узоқ йўл бор, лекин биз маррага эришиш учун муҳим босқичларни босиб ўтдик. Ўзбекистоннинг кетма-кет иккинчи йил “Partnership Awards” ғолиби деб эълон қилиниши халқаро ҳамжамият томонидан мамлакатимизда ДXШ секторини ривожлантириш борасидаги ишларнинг муваффақиятли амалга оширилаётганидан далолат беради”, — деган вазир ўринбосари.
Маълумот учун, 2022 йилда Ўзбекистон Молия вазирлиги ҳузуридаги Давлат-хусусий шерикликни ривожлантириш агентлиги Partnership Awards мукофотининг “Йил тарғиботчиси” номинациясида ғолиб бўлган. Мукофот 20 йилдан бери халқаро майдонда ДXШ соҳасида ютуқларга эришган давлатларнинг лойиҳаларига топшириб келинади. Лойиҳалар дунёдаги етакчи экспертлар томонидан баҳолаб борилади.
Изоҳ (0)