Андижонда қулупнай сотувчисини уриб, унинг ўлимига сабабчи бўлган фуқарога нисбатан жиноят иши қўзғатилди. Бу ҳақда “Дарё” мухбири хабар бермоқда.
Бош прокуратура ахборот хизматининг “Дарё” мухбирига маълумот беришича, 29 апрель куни соат 17:30 ларда фуқаро А.I. Жалақудуқ тумани “Бозорбоши” маҳалласида жойлашган буюм бозорининг кириш йўлагида мева сотаётган сотувчи П.А. билан қулупнай маҳсулотининг нархи юзасидан ўзаро жанжаллашиб қолган. Шунда фуқаро А.I. қўли билан сотувчининг юз қисмига бир маротаба урган. Оқибатда П.А. ерга йиқилиб, суд-тиббий экспертизасининг дастлабки маълумотномасига кўра “ўртача оғир” тан жароҳати олган.
Мазкур ҳолат юзасидан 30 апрель куни туман прокуратураси томонидан А.А.га нисбатан Жиноят кодексининг 105-моддаси 1-қисми (қасддан баданга ўртача оғир шикаст етказиш) билан жиноят иши қўзғатилган.
Жиноят иши бўйича дастлабки тергов ҳаракатлари олиб борилаётган вақтда П.А. кўрсатилган тиббий муолажаларга қарамасдан, 9 май куни олган тан жароҳатлари натижасида Жалақудуқ туман тиббиёт бирлашмасининг жонлантириш бўлимида вафот этган.
Дастлабки тергов давомида А.I.нинг ҳаракатлари шу куннинг ўзидаёқ Жиноят кодексининг 104-модда (қасддан баданга оғир шикаст етказиш) 3-қисми “д” бандига қайта малакаланган. Гумонланувчи Жиноят процессуал кодексининг 221-моддаси тартибида ушланиб, унга нисбатан қамоққа олиш эҳтиёт чораси қўлланилган.
Изоҳ (0)