Буюк Британия Украинага узоқ масофага мўлжалланган ракеталарини бермоқчи. Бу ҳақда Украинани қўллаб-қувватлаш халқаро жамғармасининг (IFU) қуролланиш харидларига оид эълонларини ўрганиб чиққан The Washington Post газетаси хабар берди. Ташкилотга Шимолий Европа давлатлари асос слоган бўлиб, унда Лондон етакчи ролни ўйнайди.
Ҳужжатда Британия Мудофаа вазирлиги 2 май куни 300 километр узоқликдаги нишонларга зарба бериш имкониятини қўлга киритишга “қизиқиш билдиргани” қайд этилган. Газета суҳбатдошининг айтишича, бу борада якуний қарор қабул қилинмаган, шунингдек, қанча миқдордаги қуролланиш ва уларни қачон етказиб бериш ҳақида гап кетаётганига ойдинлик киритмаган. Нашрнинг қайд этишича, ҳужжат Лондон томонидан бу турдаги қуролларни етказиб бериш борасида муҳим қадам ҳисобланади.
Сўралаётган техник тавсифлар ва имкониятлар Британиянинг Storm Shadow қанотли ракеталарига мос келади. Уларни совет даврига тегишли Украина самолётларига ўрнатиш мумкин. Бундан ташқари, Буюк Британия Украинага Storm Shadow ракеталарини бермоқчилиги ҳақида маълумотлар Америка разведкасининг ошкор қилинган махфий маълумотларида ҳам бор.
Украина ҳукумати ғарб давлатларидан узоқ масофага мўлжалланган ракеталарни сўраб бир неча бор мурожаат қилган, бироқ можаро чуқурлашиб кетиши хавфи сабаб рад жавобини олган. Украина Мудофаа вазирлиги бу каби хавфларга жавобан ракеталардан Россия ҳудудига зарбалар бермасликда ваъда берган, президент Владимир Зеленский эса бу турдаги қуролларни ҳаёт учун муҳим деб атаган.
Апрель охирларида АҚШ президенти Жо Байден маъмурияти Украинага 325 миллион долларлик янги ҳарбий ёрдам пакетини юбориши маълум бўлганди. Жанубий Корея президенти Юн Сок Ёл эса Reuters агентлигига берган интервьюсида, агар Украина аҳолиси “кенг кўламли ҳужум”га учраса, Сеул Киевга қурол беришни бошлаши мумкинлигини айтган. Бунга жавобан Россия собиқ президенти, амалдаги Хавфсизлик кенгаши раисининг биринчи ўринбосари Дмитрий Медведев Жанубий Корея Украинага қурол етказиб берган тақдирда, Россия Шимолий Кореяни қуроллантириши билан таҳдид қилди.
Изоҳ (0)